Agjencia e inteligjencës norvegjeze beson se spiunët rusë po veprojnë në perëndim të vendit nordik dhe po planifikojnë akte sabotimi. Në një intervistë me transmetuesin publik të vendit, shefi i divizionit perëndimor të Shërbimit Informativ Norvegjez (PST) tha se agjentët rusë synonin të sabotonin infrastrukturën kritike, si dhe instalimet ushtarake dhe rutinat e gatishmërisë. "Agjentët e inteligjencës ruse po punojnë kundër një sërë objektivash, të tilla si infrastruktura dhe instalimet ushtarake kritike dhe të cenueshme. Ata gjithashtu kanë një qëllim të qartë për të ekspozuar planet norvegjeze të emergjencës," tha Torgils Lutro për Korporatës Norvegjeze të Transmetimeve (NRK). Baza më e madhe detare e Evropës Veriore, si dhe objektet thelbësore të naftës, gazit dhe energjisë në rajon janë të gjitha në rrezik të sabotimit, paralajmëroi Lutro.
Ndërsa nuk specifikon numrin e saktë të agjentëve rusë aktivë në zonë, ai thotë se ishin disa. "Ne shohim se disa nga synimet e Rusisë mund të jenë përgatitja e akteve të sabotimit. Ata po veprojnë në të gjithë zonën dhe po lëvizin," tha Lutro, duke shtuar se një nga objektivat e Moskës mund të jetë dëmtimi i reputacionit të Norvegjisë midis aleatëve të saj. "Është e qartë se një nga qëllimet e Rusisë është të na bëjë të dukemi keq. Ata do të përpiqen të tregojnë se ne nuk e kontrollojmë situatën ose se nuk mund t'i ndihmojmë aleatët tanë me eksporte në situata të mundshme të ardhshme," tha ai. Qe nga fillimi i luftës në Ukrainë, autoritetet norvegjeze kanë dëbuar 15 diplomatë rusë për spiunazh të dyshuar. Kjo e detyroi Kremlinin të rishqyrtojë personelin dhe burimet e tij të inteligjencës, sipas PST.
