Inflacioni në 19 vendet që përdorin euron shënoi një rekord të ri prej 8.1 për qind në muajin maj, për shkak të rritjes së çmimeve të energjisë dhe ushqimeve, njoftoi sot agjencia e statistikave të Bashkimit Evropian Eurostat.
Në muajin prill, inflacioni vjetor ishte 7.4%. Ekonomistët kishin parashikuar një rritje deri në 7.8 për qind në muajin maj.
Inflacioni i çmimeve në eurozonë nuk ka qenë kurrë kaq i lartë që nga prezantimi i monedhës së përbashkët në vitin 1999.
Norma ka qenë në rritje që nga vera e vitit 2021, duke regjistruar vazhdimisht një rekord të ri. Lufta në Ukrainë dhe masat e ashpra të koronavirusit në Kinë shkaktuan rritjen e çmimeve.
Edhe një herë, inflacioni u nxit nga një rritje jashtëzakonisht e madhe e çmimit të energjisë, me 39.2 për qind në baza vjetore. Çmimet e ushqimeve dhe pijeve ishin 7.5 për qind më të shtrenjta se një vit më parë.
Në maj, inflacioni bazë që përjashton energjinë, ushqimin, alkoolin dhe duhanin u rrit në 3.8 për qind nga 3.5 për qind. /ATSH
