Është bërë inaugurimi i veprës së artit në hapësira publike “Never Say Never” e artistit Alban Muja. Kjo vepër rrjedh nga diskutimi televiziv politik i Adem Demaçit dhe të burgosurve të tjerë në vitet e 90-ta, kur luftërat në ish-Jugosllavi kishin shpërthyer dhe “Never Say Never” është thirrje për të mos hequr dorë nga liria e barazia.

Artisti Alban Muja është shprehur i kënaqur që pas një punë të gjatë kanë arritur ta përfundojnë këtë vepër. Ai ka treguar idenë e kësaj vepre.

“Është kënaqësi e privilegj që po prezantojmë një punë që kemi filluar më shumë së një vit, por që katër muaj kemi punuar intensivisht. Si ide rrjedh për më shumë se 20 vite, si inspirim vjen prej një diskutimi publik të politikanit, Adem Demaçi. Dhe si ide kemi munduar se një vepër duhet t’i dedikohet atij dhe gjithë të burgosurve politikë të Kosovës të viteve ‘80-ta dhe ‘90-ta... Never Say Never që rrjedh nga diskutimi televiziv i Adem Demaçit, i cili thërriste dhe luftonte për lirinë dhe pavarësinë që ne gëzojmë sot, bashkë me të burgosurit tjerë dhe gjithë kontributin është kjo vepër që e kemi sot, të cilën e kemi punuar me shumë dëshirë... Po ashtu, shpresoj se kjo do të jetë vetëm një nisje që hapësirat publike të gjithë Kosovës do të shndërrojmë në hapësira ku do të kenë edhe një domethënie që e kaluara s’duhet harruar”, tha Muja.

Ministri i Kulturës, Rinisë dhe Sportit, Hajrulla Çeku e ka përshkruar Adem Demaçin si një figurë qendrore të rezidencës kombëtare.

Çeku, po ashtu, tha se hapësirat publike të qyteteve duhet të jenë hapësira për më shumë art mes publikut dhe veprave të artit.

“Janë të paktën dy karakteristika të veçanta të kësaj që po inaugurojmë sot këtu, njëra lidhet me atë se çfarë shënjon kjo vepër dhe që lidhet me figurën e Adem Demaçit, një nga figurat qendrore të rezidencës kombëtare, shqiptare, por jo vetëm me emrin e tij por edhe më shumë të tjerë që kanë qenë pjesë e kësaj rezidence dhe këtij aktivitetit politik. Përveç shumë shënjueseve të tjerë, përfshirë shtëpitë e familjes Demaçi që gëzojnë statusin e monumentit nën mbrojtje, sot po e shtojmë edhe një pikë për ta mineralizuar gjithë atë rezistencën kombëtare që e ka udhëheq Demaçi dhe plot të tjerë. Çështja tjetër është se hapësirat publike të qyteteve tona të jenë hapësira për më shumë art mes publikut dhe veprave të artit”, tha Çeku.

Kryetari i Komunës së Prishtinës, Përparim Rama në një fjalë rasti tha se kjo vepër duhet të merret si një pikënisje e gjithë popullit që nëse besohet mund të arrihet çdo gjë.

“Ka një kuptim të madh që e përjetëson punën e shumëvjeçare të Adem Demaçit, të njeriut të madh të gjithë shqiptarisë, përjetëson gjithashtu edhe fjalën e tij që e kishte thënë në Beograd “Kurrë mos thuaj kurrë”, në kohën kur ndoshta shumë pak guximtarë kanë mundur të shprehen lirshëm për këtë fokusin e shqiptarëve në Jugosllavinë e atëhershme, ku e vetmja rrugë për Kosovën është ajo e pavarësisë, e këtë e ka thënë me gjithë shpirt Adem Demaçi midis Beogradit. “Never Say Never”, duhet të merret si një pikënisje e gjithë popullit tonë që nëse ne besojmë mundemi të arrijmë çdo gjë, fjalë që e ngrit vetëbesimin në popullin tonë, është fjalë që i kujton të gjithë të burgosurit politikë që kanë qëndruar stoik në lidhje me këtë, që po mundemi të jemi të lirë, të barabartë dhe që mundemi të arrijmë atë që besojmë”, tha Rama.