Ish-kryeministri Avdullah Hoti ka folur sot mbi raportimin e guvernatorit të BQK-së Ahmet Ismaili për takimin në Bruksel para Komisionit për Buxhet, Punë dhe Transfere.

Në një postim në Facebook, Hoti ka thënë se guvernatori Ismaili nuk ka pasur ftesë nga ndërmjetësi i BE-së për dialog, pasi që ftesën e ka pranuar Qeveria e Kosovës, e cila e ka përcjellë atë më pas te guvernatori.

“Edhe pse guvernatori deklaroi se e ka parë të panevojshme të shkojë në Bruksel, ka vendosur të shkojë. Takimi i dialogut në Bruksel është bërë mes guvernatorit dhe disa zyrtarëve të Ministrisë së Financave të Serbisë. Takimi nuk ka qenë me homologun e tij. Nuk ka asnjë informatë zyrtare me shkrim se çfarë është biseduar në takim me palën serbe. Guvernatori deklaron se “nuk ka biseduar asgjë që nuk është dashur të bisedohet”. Kaq për transparencën e këtij takimi”, ka shkruar Hoti.

Ismaili: Rregullorja e BQK-së është në fuqi, askush s’po kërkon ndryshim • KosovaPress

Hoti ka rikujtuar aktgjykimin e Gjykatës Kushtetuese të Kosovës, e cila qartëson se Qeveria e Kosovës është i vetmi institucion që përfaqëson Kosovën në dialog me Serbinë, andaj pjesëmarrja e guvernatorit në këtë takim nuk është në përputhje me autorizimet ligjore të tij.

“Kompetencat e Guvernatorit sipas nenit 37 të Ligjit për BQK nuk parashohin se Guvernatori e përfaqëson Kosovën në dialog me një vend fqinj për zbatimin e rregullores së BQK-së”, ka shtuar Hoti.

Ismaili thotë se BQK-ja nuk është ndikuar nga masat e BE-së • KosovaPress

Ai thotë se guvernatori i BQK-së është instrumentalizuar nga Qeveria e Kosovës dhe si shqetësim përmend faktin se çdo koordinim lidhur me këtë rregullore ka pasur mundësi të bëhet në zyrën e guvernatorit në BQK.

Përfundon takimi trepalësh në Bruksel për çështjen e dinarit serb • KosovaPress

Ndryshe, guvernatori Ahmet Ismaili sot para komisionit për buxhet ka thënë se ekipi i Bankës Qendrore të Kosovës në takimin në Bruksel ka qenë vetëm që të flasë për rregulloren e këtij institucioni financiar mbi ndalimin e dinarit serb dhe se nuk ka shkuar aty në mandat të negociatorit.