Atmosferë shumë pozitive po mbretëron te Kombëtarja e Kosovës në hendboll (femrat) e cila është mbledhur të dielën kur e ka zhvilluar stërvitjen e parë në Prishtinë. Ndërkohë të hënën paradite është zhvilluar stërvitja e dytë.

Nën urdhrat e selektorit Agron Shabani, vajzat po përgatiten për dy ndeshjet e vështira dhe vendimtare për kualifikim në Kampionatin Botëror të këtij viti. Përballë Kosovës do të jetë Polonia, Kombëtarja me traditë të gjatë dhe e nivelit të lartë evropian.

Hendbollistet po punojnë me përkushtim maksimal për t’u përgatitur sa më mirë për ndeshjet me polaket. Të kujtojmë që në fazën e parë kualifikuese, Kosova e eliminoi Kombëtaren e Ishujve Faroe, për suksesin historik.