Kryeministri në detyrë, Albin Kurti, dhe ministrat në detyrë, të cilët janë certifikuar edhe si deputetë, kanë uzurpuar pozitat ekzekutive, thotë profesori i të Drejtës Ndërkombëtare, Enver Hasani. Sipas tij, një gjë e tillë konfirmohet edhe në aktgjykimin e Gjykatës Supreme, të cilin e vlerëson si profesional dhe detyrimisht të zbatueshëm, pasi i njëjti – sipas Hasanit nuk mund të ankimohet në Gjykatën Kushtetuese nga ekzekutivi në detyrë.

Gjykata Supreme, më 15 korrik, mori vendim se nxjerrja e akteve nënligjore nga ministrat që janë njëkohësisht deputetë është e kundërligjshme, pasi shkelen dispozitat kushtetuese.

Hasani, në një intervistë për KosovaPress, thotë se çdo mospërfillje e këtij aktgjykimi të Supremes mund të përbëjë shkelje penale për ministrat në detyrë, të cilët janë certifikuar edhe si deputetë pas zgjedhjeve parlamentare të 9 shkurtit.

Sipas tij, Supremja nuk e ka interpretuar Kushtetutën, por vetëm e ka zbatuar atë, ashtu siç e detyron Kushtetuta.

Qeveria në detyrë ka reaguar kundër vendimit të Supremes, duke e konsideruar atë arbitrar dhe të njëanshëm, madje kanë paralajmëruar edhe dërgimin e vendimit në Gjykatën Kushtetuese.

Megjithatë, profesori Hasani, i cili ka qenë edhe ish-kryetar i Gjykatës Kushtetuese, thotë për KosovaPress se qeveria nuk ka të drejtë të dërgojë vendimet e Gjykatës Supreme në Kushtetuese.

Sipas tij, aktgjykimi i Supremes është detyrimisht i zbatueshëm dhe nuk mund të ankimohet.

Ai ngre dyshime nëse ministrat në detyrë, të cilët janë certifikuar edhe si deputetë, do ta zbatojnë aktgjykimin e Supremes. Por, sipas tij, moszbatimi i vendimit mund të ketë pasoja penale dhe Prokuroria duhet të jetë vigjilente në këtë drejtim.

Pas aktgjykimit të Gjykatës Supreme, ku theksohet se ministrat në detyrë që janë certifikuar si deputetë nuk mund të ushtrojnë më funksione ekzekutive, kanë reaguar edhe partitë politike.

Në PDK thanë se Supremja ka vulosur faktin se mbajtja e funksioneve të dyfishta nga ana e ministrave që njëkohësisht janë edhe deputetë është në kundërshtim me ligjin.

Lajmi i plotë në sistemin me parapagim...

Gruda, në një konferencë për media të mërkurën, tha se pas këtij aktgjykimi, çdo ditë që këta zyrtarë publikë vazhdojnë të mbajnë dy funksione nënkupton kryerje të veprës penale të moszbatimit të vendimit gjyqësor.

Po ashtu, edhe anëtarë të LDK-së kanë dorëzuar në Prokurorinë Speciale aktgjykimin e Supremes, duke ia bashkangjitur 17 kallëzimet penale që kanë bërë më herët për anëtarët e kabinetit të Qeverisë Kurti, të cilët janë certifikuar edhe si deputetë./E.Zeqiri/

/Kosovapress/