Drejtori i Zyrës për Mbrojtjen e Viktimave në kuadër të Zyrës së Prokurorit të Shtetit, Demë Hasanaj ka pranuar se ka raste kur shtyhet intervistimi i viktimave në mungesë të psikologëve. Në një deklaratë me shkrim për KosovaPress, ka thënë se në disa raste duhet të pritet sigurimi i psikologëve në intervistim.
Në rastin e raportuar në qershor të 11-vjeçares nga Prishtina, e cila dyshohet se ishte dhunuar seksualisht, për më shumë se dy javë nuk është marrë në intervistim e mitura nga prokurori i rastit.
“Në të shumtën e rasteve intervistimi i viktimave fillon në kohën sa më të shpejt, mirëpo kemi raste që duhet të shtyhet intervistimi i viktimave për mungesë të psikologëve, për vet faktin se psikologët janë të punësuar nëpër institucione tjera. Në rastet kur nuk mund të sigurohet prezenca e psikologëve, patjetër që duhet të pritet deri në sigurimin e psikologëve”, tha ai.
I pyetur se sa po merr kohë intervistimi i viktimave të dhunës seksuale, ai thotë se rastet e natyrës urgjente po trajtohen me prioritet.
Po ashtu, Hasanaj thekson se ka raste edhe kur intervistimi bëhet pa prezencën e psikologëve.
“Zakonisht psikologet dhe punëtorët social janë prezent gjatë intervistimit të viktimave, mirëpo kemi raste ku kemi mungesën e psikologëve. Gjatë sezonit të pushimeve vjetore mund të ketë rast kur mungon psikologu, mirëpo në shumicën e rasteve psikologet dhe punëtorët e social janë prezent”, thuhet në përgjigjen e Hasanaj.
Në fund të gushtit dyshohet se e mitura u dhunua seksualisht nga pesë persona për shtatë orë radhazi, përfshirë edhe të mitur. Ndërkohë, vetëm pasi ky rast është bërë publik, në fund të muajit gusht, u arrestuan gjashtë persona të tjerë për rastin e raportuar në qershor dhe dyshohen për kryerjen e veprës penale të dhunimit, të trafikimit me njerëz dhe të shërbimeve seksuale të viktimës së trafikimit. Tashmë ndodhën në paraburgim 11 persona për 30 ditë.
