Kryetari i Aleancës për Ardhmërinë e Kosovës (AAK), Ramush Haradinaj, ka thënë se gjuha të cilën është duke e përdorur Serbia, është gjuhë e cila i ka shkaktuar tragjeditë, plagët e të cilave po i vuajmë ende.
Haradinaj ka thënë se kjo gjuhë i takon të kaluarës.
Haradinaj ka shtuar se Serbia duhet të ndal kërcënimet dhe të mos harrojë se ka një marrëveshje me Kosovën, planin franko-gjerman.
“Vendet e lira, në vendimet e tyre të bazuara në interesin e tyre nacional, e kanë njohur Kosovën. Serbia duhet ta ndal gjuhën e të fuqishmit, të ndal kërcënimet dhe mos të harrojë se e ka një marrëveshje me Kosovën, planin franko-gjerman të përkrahur nga Amerika, dhe t'i kthehet gjuhës së arsyes”.
Ky reagim i Haradinajt vjen pas kërcënimeve të ministrit serb të Mbrojtjes, njëherësh edhe kryetar i Partisë Progresive Serbe, Millosh Vuçeviq, i cili ka deklaruar se “Mali i Zi dhe Maqedonia e Veriut e kanë ofenduar Serbinë me njohjen e pavarësisë së Kosovës”, duke theksuar se “kjo paraqet ndërhyrje në punët e brendshme të një vendi dhe duke kërcënuar me destabilizimin e rajonit”.
“Ke bërë një gabim dhe do të të godasë në kokë, ashtu siç i godet në Ukrainë të gjithë ata që e promovuan Kosovën si shtet të pavarur. Ju e keni hapur kutinë e Pandorës. Përgjigjet tuaja burokratike se Kosova është ‘sui generis’, se është një rast i veçantë, janë qesharake. As Albin Kurti dhe as Tirana nuk të besojnë në këtë”, ka thënë ai për një medium në Serbi.
