Një organizate bamirëse nga Turqia, që shtron iftar falas për qytetarët mitrovicas gjatë muajit të Ramazanit, i është grisur flamuri nacional i këtij shteti, i vendosur në tendën ku ofrohet shujta e mbrëmjes për ata që agjërojnë dhe jo vetëm, në sheshin Adem Jashari.

Ngjarja ka ndodhur të enjten, por kjo nuk ishte hera e parë, pasi diçka e ngjashme ka ndodhur edhe disa ditë më herët, sipas një burimi.

Përgjegjësi i organizatës që shtron iftar nuk e ka paraqitur rastin në polici, herën e parë, por të dytën po ndërsa ka thënë se grisja e flamurit të Turqisë i krijon atij dhe stafit pasiguri.

I njëjti ka thënë që nëse nuk i ofrohet siguri, do t’i duhet ta ndërpresë ofrimin e iftarit për mitrovicasit.

Ky rast është marrë për t’u hetuar nga krimet e rënda ndërsa KosovaPress mëson që për këtë arsye, policia ka vendosur ta vendos një pikë statike te kjo tendë.

Në tendën ku ofrohet shujta, pos flamurit turk është i vendosur, nga organizatori edhe ai i Kosovës, por ky, në asnjërin rast, nuk është grisur.

/Kosovapress/