Një rast grabitjeje ka ndodhur pasditen e 11 prillit në fshatin Zym të Prizrenit.

Sipas raportit të policisë, dy persona derisa ishin duke udhëtuar me veturë, kanë hasur në pengesa të vendosura me gurë në rrugë. Pasi janë ndalur dhe kanë dalë nga vetura për t’i larguar pengesat, ata dyshohet se janë përballur me dy persona të panjohur të armatosur me armë automatike (AK-47), raporton KosovaPress.

Policia tha se të dyshuarit, nën kërcënimin e armëve, u kanë grabitur viktimave një shumë parash dhe më pas janë larguar në drejtim të panjohur, duke shtënë me armë në drejtim të pyllit.

Në vendin e ngjarjes kanë dalë njësitë relevante të Policisë së Kosovës, ku është gjetur dhe konfiskuar një gëzhojë fisheku.

“Dy viktimat meshkuj kosovar derisa kanë qenë me veturë duke udhëtuar në rrugë kanë hasur në pengesa me gurë dhe pasi  janë ndalur, kanë dalur nga vetura për ti largua pengesat, dyshohet se dy persona  të panjohur të armatosur- me AK-47  u kanë grabitur një shumë parash, dhe më pas ishin larguar në drejtim të panjohur duke shtënë me armë në drejtim të pyllit.   Në vendin e ngjarjes kanë dalë të gjitha njësitë relevante të policisë dhe kanë gjetur e konfiskuar një gëzhojë të fishekut”, thuhet në raportin 24 orësh të policisë.

Sipas policisë, lidhur me rastin janë intervistuar dy persona të dyshuar meshkuj kosovarë, të cilëve u janë sekuestruar dy telefona mobilë. Megjithatë, në mungesë të provave, me urdhër të prokurorit ata janë liruar në procedurë të rregullt.

Policia njofton se rasti mbetet në hetime.

/Kosovapress/