Sot rreth orës 15:15 është raportuar për një grabitje në një këmbimore në lagjen “Tophane” në Prishtinë, ku një i dyshuar ka shtënë me armë zjarri.

Si reagim ndaj të shtënave të të dyshuarit, në përpjekje për të parandaluar grabitjen një qytetar po ashtu ka shtënë me armë zjarri.

Pas marrjes së informacionit, zyrtarët e Policisë së Rajonit të Prishtinës kanë dalë në vendngjarje dhe kanë ndërmarrë të gjitha masat e nevojshme operativo-policore. Pak minuta pas raportimit të rastit, ata kanë arritur që në Obiliq të arrestojnë personin e dyshuar, i cili është i lënduar.

Të njëjtit për shkak të lëndimeve, dyshohet të jetë plagosur, i është ofruar tretmani i nevojshëm mjekësor.

Në lidhje me rastin, policia ka sekuestruar veturën e të dyshuarit, si dhe një armë automatike të tipit  AK-47.

Hetuesit po vazhdojnë me ndërmarrjen e veprimeve për të zbardhur plotësisht rrethanat e ngjarjes.