Real Madrid ka marrë lajme të hidhura para ndeshjes së parë të rëndësishme në raundin e 16-të të Ligës së Kampionëve kundër Manchester City-t.

Edhe pse rikuperimi i tij po shkon mirë, është konfirmuar përfundimisht se Kylian Mbappe nuk do të jetë i gatshëm për sfidën e kësaj të mërkure në "Santiago Bernabeu".

Sipas raportimeve të fundit nga MadridUniversal, numri 10 i Madridit është rikthyer në klub pas një jave trajtimi në Paris për lëndimin e tij në gju.

Plani i klubit është që ai të rikthehet gradualisht, me shpresën për të marrë disa minuta në fundjavë kundër Elche-s, në mënyrë që të jetë gati për ndeshjen e kthimit në "Etihad".

Përveç Mbappes, Real Madridi ka konfirmuar zyrtarisht edhe lëndimin e mbrojtësit të majtë, Alvaro Carreras. Lojtari vuan nga një dëmtim muskulor në pulpën e këmbës së djathtë dhe do të mungojë gjithashtu në sfidën e parë ndaj City-t.

Lista e mungesave për Arbeloan është bërë alarmante, pasi përveç tyre, jashtë mbeten edhe emra si Jude Bellingham, Rodrygo, Militao, Alaba dhe Ceballos, duke e vështirësuar maksimalisht misionin e "Mbretërve" kundër ekipit të Pep Guardiolës.

KosovaPress