Gara në play off-in e Superligës së Kosovës në hendboll për femra vazhdon në mesjavë me zhvillimin e ndeshjeve të dyta gjysmëfinale, që pritet të sjellin emocione të reja dhe luftë të fortë për një vend në finale.

Në arenën “Bill Clinton” në Ferizaj, sot më 7 maj, nga ora 17:00, skuadra e Ferizajt do të përballet me Samadrexhën. Mysafiret vijnë në këtë takim me epërsi të konsiderueshme, pasi në ndeshjen e parë triumfuan bindshëm me rezultat 35:26, duke hedhur një hap të madh drejt finales.

Në përballjen tjetër gjysmëfinale, që zhvillohet nga ora 20:00 në palestrën në Banjë, Istogu do ta presë Shqiponjën. Edhe këtu skuadra mysafire është më afër finales, pasi në takimin e parë fitoi me rezultat 25:21.

Megjithatë, asgjë nuk është vendosur ende. Ferizaj dhe Istogu do të tentojnë të shfrytëzojnë përparësinë e terrenit vendas për të barazuar serinë dhe për ta çuar atë në ndeshjen e tretë vendimtare.

Ndeshjet pritet të jenë të luftuara deri në fund, ku katër skuadrat synojnë të sigurojnë një vend për në finale.

KosovaPress