Kapiteni i Kombëtares së Shqipërisë, Berat Gjimshiti, foli në konferencën për shtyp para ndeshjes ndaj Izraelit, e cila do të zhvillohet nesër në ora 20:00.

Mbrojtësi shqiptar komentoi fillimin e epokës së re me trajnerin e ri, të ardhmen e tij në kombëtare dhe gjendjen e skuadrës pas një sezoni të gjatë.

“Sigurisht që nuk është e thjeshtë, sepse u kthyem nga një humbje e rëndësishme me objektiva të qarta për të arritur atë gjë që në fillim të sezonit dukej e pamundur, por pastaj siç shkoi i gjithë rrugëtimi, po besoj se të gjithë ishim të bindur që mund ta arrijmë atë gjë që do të ishte shumë e bukur për ne si kombëtare dhe si shtet. Por prapë besoj se tash është një rifillim i ri me një staf të ri, jemi të gjithë të motivuar.”

“Të them të drejtën nuk e kam menduar akoma, që besoj se është një sinjal pozitiv. Shpresoj që do të luaj edhe disa vite, sa më shumë sa trupi dhe rrethi im janë të gatshëm për me lujt në nivelet e larta dhe pastaj do ta marr vendimin, por në këto momente nuk jam tu mendu fare.”

Duke folur për lodhjen e futbollistëve në fund të sezonit, kapiteni i kuqezinjve thekosi se energjia është në nivel të duhur.

Shqipëria do ta shfrytëzojë përballjen ndaj Izraelit si një mundësi për të nisur pozitivisht epokën e re nën drejtimin e trajnerit të ri, ndërsa deklaratat e Gjimshitit tregojnë se brenda grupit vazhdon të ekzistojë besimi për të arritur objektivat e mëdha në vitet e ardhshme.