Edhe Policia e Kosovës ka konfirmuar se personi i cili ishte zhdukur në Liqenin e Batllavës është gjetur sot pa shenja jete, në ditën e dytë të operacionit të kërkim-shpëtimit.

Sipas Policisë, rasti ishte raportuar dje rreth orës 13:00, pasi ishte marrë informata se një person kishte hyrë në ujërat e Liqenit të Batllavës dhe më pas nuk ishte parë të dilte.

"Menjëherë pas pranimit të informatës janë angazhuar të gjitha njësitë relevante policore, si dhe njësitë e tjera të kërkim-shpëtimit, me qëllim të lokalizimit të personit", thuhet në njoftimin e Policisë.

Ndërsa sot, pas përpjekjeve të ekipit të kërkim-shpëtimit, personi është nxjerrë nga uji, ndërsa ekipi mjekësor në vendin e ngjarjes ka konstatuar se ai ishte pa shenja jete.

“Në koordinim me prokurorin e shtetit, po ndërmerren veprimet e nevojshme procedurale dhe hetimore lidhur me rastin”, ka bërë të ditur për KosovaPress zëdhënësi i Policisë së Kosovës për kryeqytetit, Enis Pllana.

Shkurtimisht lidhur me rastin:

Blerim Ruhani humbi jetën pasi u zhduk derisa po notonte. Rasti u raportua të martën rreth orës 13:00, kur Policia e Kosovës u njoftua se një person kishte hyrë në ujë dhe nuk ishte parë më të dilte.

Menjëherë pas raportimit, autoritetet nisën një operacion të gjerë kërkim-shpëtimi, ku u angazhuan ekipet e kërkim-shpëtimit.

Pas dy ditësh kërkime, ekipet e FSK-së arritën të lokalizojnë dhe nxjerrin nga uji trupin e pajetë të 25-vjeçarit. Ekipi mjekësor në vendngjarje konstatoi vdekjen e tij, ndërsa me urdhër të prokurorit të shtetit kanë nisur procedurat hetimore për zbardhjen e plotë të rrethanave të rastit.

/Kosovapress/