Në orët e mbrëmjes vazhdon fluksi i udhëtarëve në disa nga pikat kufitare të Kosovës me Serbinë.

Pritjet më të gjata janë në Merdarë, ku në dalje është krijuar kolona e gjatë tri kilometra e gjysmë dhe pritjet shkojnë deri në më shumë se nëntë orë, ndërsa në hyrje pritjet janë 3-5 minuta dhe nuk ka kolonë.

Qendra kombëtare për menaxhim kufitar më herët ka njoftuar se pritjet e gjata në këtë pikë kufitare janë si rezultat i neglizhencës së palës serbe të kontrollit, ku janë duke punuar vetëm dy zyrtarë policorë.

Sipas të dhënave të Qendrës kombëtare për menaxhim kufitar të orës 18:57, kolonë ka edhe në pikën tjetër kufitare Mutivodë, 500-600 metra dhe pritjet në dalje janë deri më shumë se katër orë, ndërsa në hyrje 3-5 minuta dhe s’ka kolonë.

Te Dheu i Bardhë janë krijuar kolona 300 metra të gjata dhe pritjet për të dalë nga kjo pikë kufitare janë 40 minuta, ndërsa për të hyrë duhet pritur 3-5 minuta dhe nuk ka kolona. Pritjet në Bërnjak janë 60-80 minuta në dalje, por nuk ka kolona, ndërsa në hyrje 3-5 minuta dhe po ashtu nuk ka kolona.