G7 finalizoi detajet për një kredi prej 50 miliardë dollarësh për Ukrainën, të mbështetur nga asetet e ngrira ruse, njoftoi Shtëpia e Bardhë të mërkurën.

Daleep Singh, zëvendës-këshilltari i sigurisë kombëtare i presidentit të SHBA-së Joe Biden për ekonominë ndërkombëtare, konfirmoi se marrëveshja është përfunduar me SHBA-në për të dhënë një kredi prej 20 miliardë dollarësh. Pjesa e mbetur do të vijë nga G7, duke përfshirë BE-në, Britaninë e Madhe, Kanadanë dhe Japoninë.

"Asgjë e tillë nuk është bërë kurrë më parë. Asnjëherë më parë një koalicion shumëpalësh nuk ka ngrirë asetet e një vendi agresor dhe më pas ka shfrytëzuar vlerën e këtyre aseteve për të financuar mbrojtjen e palës së dëmtuar, duke respektuar sundimin e ligjit dhe duke ruajtur solidaritet”, u tha ai gazetarëve.

"Si rezultat, Ukraina do të marrë ndihmën që i nevojitet tani pa i ngarkuar taksapaguesit tanë," shtoi Singh.

Shpërndarja do të fillojë deri në fund të vitit, por Singh tha se SHBA shpreson të sigurojë që gjysma e 20 miliardë dollarëve të vijë në formën e ndihmës ushtarake për Ukrainën. Kjo do të kërkonte miratimin e Kongresit përpara mesit të dhjetorit, dhe me ligjvënësit në mes të zgjedhjeve është e paqartë nëse do të ndodhte.

E gjithë ndihma ekonomike e SHBA-së do të shpërndahet përmes fondit ndërmjetës financiar të Bankës Botërore për Ukrainën, për të cilin Singh tha se "do t'i nënshtrohet masave të forta të llogaridhënies dhe transparencës, njësoj si ato të përdorura për ndihmën ekonomike ekzistuese të SHBA-së për Ukrainën".

Parlamenti Evropian (PE) miratoi të martën një kredi deri në 37.8 miliardë dollarë për Ukrainën. Paketa e ndihmës u miratua me shumicë dërmuese me 518 vota kundër 56, me 61 abstenime. /AA