Në të mirë të volejbollit dhe komunitetit sportiv në vend, në ambientet e Federatës së Volejbollit të Kosovës është nënshkruar marrëveshja dypalëshe e bashkëpunimit mes Federatës së Volejbollit të Kosovës dhe Agjencisë së Lajmeve KosovaPress.

Kjo marrëveshje, e cila do të vlejë për një periudhë njëvjeçare, synon rritjen e mbulimit mediatik të aktiviteteve të shumta të Federatës së Volejbollit të Kosovës, duke i ofruar publikut informim më të shpejtë dhe më të gjerë për zhvillimet në sportin e volejbollit.

Në emër të Federatës së Volejbollit të Kosovës, marrëveshja u nënshkrua nga presidenti Bahri Gjinovci, ndërsa në emër të KosovaPress nga drejtoresha e përgjithshme Suzana Rakovica.

Të dyja palët u shprehën të lumtura për këtë bashkëpunim, duke theksuar se përfituesi më i madh i kësaj marrëveshjeje do të jetë publiku dhe adhuruesit e sportit të rrjetës, volejbollit, përmes rritjes së informimit dhe promovimit të aktiviteteve sportive në vend.

Po ashtu, nga ky bashkëpunim pritet që prezenca e volejbollit në opinion të vijë me një standard të ri promocioni, duke synuar që shumë shpejt të nisë edhe një emision special i dedikuar për volejbollin, si dhe një sërë befasish të tjera që do të kontribuojnë në promovimin dhe zhvillimin e mëtejshëm të këtij sporti në Kosovë.

KosovaPress