Federata e Futbollit të Kosovës në bashkëpunim me Komunën e Prishtinës do të krijojnë Ligën e Shkollave të Mesme, projekt që do të nis së zbatuari në muajin shkurt të vitit të ardhshëm.

“Presidenti i FFK-së, Agim Ademi ka pritur në takim, nënkryetaren e Komunës së Prishtinës, Donjeta Sahatçiu si dhe Drejtorin e Sportit, Granit Rugova. Shkak i këtij takimi ka qenë iniciativa e rëndësishme që do të ndryshojë peizazhin e futbollit të shkollave të mesme në Kosovë – Liga e Shkollave të Mesme. Ky projekt është një nismë e Komunës së Prishtinës në bashkëpunim me Federatën e Futbollit të Kosovës. Federata, gjithmonë e përkushtuar ndaj sportit të rinisë dhe të shkollave, është e hapur për të mbështetur projekte inovative të këtij lloji. “Liga e Shkollave të Mesme” është një projekt pilot që do të fillojë punën tani dhe zbatimi i saj fillon në shkurt të vitit 2024.”, thuhet në njoftimin e FFK-së, përcjellë KosovaPress.

Shkollat që do të marrin pjesë në këtë projekt janë: Sami Frashëri, Xhevdet Doda, Eqrem Çabej, Dr. Ali Sokoli, 28 Nëntori, Shtjefen Gjeqovi, Hoxhë Kadri Prishtina, 7 Shtatori, Abdyl Frashëri, Prenk Jakova, Gjin Gazulli, Alauddin, Gjimnazi Matematikor, Sami Frashëri II.