Shtegu i Brezovicës, më i gjati në Kosovë (7.7 kilometra) gjithmonë është atraktiv për garuesit e disiplinës malore dhe nuk ka si të jetë ndryshe as në garën e kësaj fundjave, e katërta e Exfis Kampionatit të sivjetmë të Kosovës.

Pjesëmarrjen e kanë konfirmuar disa nga garuesit që synojnë rezultate të mira, e pse jo edhe fitoren. Gazmend Demolli, Laszlo Szasz, Gentjan Shaqiri, Përparim Dushi e të tjerë janë të gatshëm për të dhënë maksimumin.

Gjithsesi, do të jetë shumë e vështirë të arrihet rekordi i Liridon Kalenderit, i vendosur në vitin e kaluar. Kalenderi me Mitsubishi Evo 9 Monster në cak arriti për 03:55.422, me shpejtësi mesatare prej 117.745 km/h.

Sigurisht që edhe garuesit tjerë në garë hyjnë me ambicie për plasman sa më të mirë. Paraqitja në garë bëhet të shtunën nga ora 09:00-11:00 e pas procedurave tjera: verifikimi i dokumentacionit, kontrolli teknik e publikimi i listës startuese, në orën 13:00 nis vozitja e parë testuese.

Të dielën, në orën 11:45 bëhet hapja zyrtare e garës, derisa gara zyrtarisht nis në orën 12:00.