Forcat somaleze të sigurisë janë ende duke luftuar me terroristët e al-Shabaab në një hotel të rrethuar në kryeqytetin Mogadishu, rreth 15 orë pas fillimit të sulmit, thanë zyrtarët të hënën.
Sipas raportimeve të mediave lokale, të paktën katër persona janë vrarë në hotelin Villa Rose, i cili u sulmua nga sulmuesit të dielën mbrëma.
“Sulmi filloi me shpërthime, pasuar nga të shtëna me armë brenda hotelit. Ne po përpiqemi t'i japim fund rrethimit,” tha një zyrtar i sigurisë në Mogadishu për Anadolu Agency, duke kërkuar anonimitetin pasi nuk ishte i autorizuar të fliste me mediat.
Samra Mohamed, e cila jeton pranë hotelit, tha për Anadolu Agency se ajo “ende po dëgjonte të shtëna të forta dhe ndonjëherë shpërthime të fuqishme”.
Disa zyrtarë ishin të pranishëm kur filloi sulmi dhe arritën të shpëtojnë të padëmtuar.
Një deklaratë e policisë tha se forcat e sigurisë shpëtuan shumë njerëz, duke përfshirë civilë dhe zyrtarë.
Somalia është rrënuar nga pasiguria për vite me radhë, ku al-Shabaab, e cila është e lidhur me organizatën terroriste Al-Kaeda, është një nga kërcënimet kryesore.
Që të paktën nga viti 2007, al-Shabaab ka zhvilluar një fushatë vdekjeprurëse kundër qeverisë somaleze dhe forcave ndërkombëtare, duke marrë mijëra jetë.
Pati të paktën 1.518 viktima civile – 651 të vrarë dhe 867 të plagosur – në sulmet terroriste në Somali në vitin 2018, të ndjekur nga 1,459 – 591 të vrarë dhe 868 të plagosur – në vitin 2019, sipas vlerësimeve të OKB-së.
