Përmes një postimi në faqen zyrtare në “Facebook”, zëvendës-ministrja e Ministrisë së Kulturës Rinisë e Sportit, Daulina Osmani ka folur për licencimin e federatave sportive në vend.

Federatat e fundit të cilat morën licencën nga MKRS ishin ajo e Kickboxit, e Shahut dhe Federata e Futbollit të Kosovës, raporton KosovaPress.

Por, zëvendës-ministrja Osmani bëri të ditur se të tri këto federata janë licencuar, por se janë licencuar me kusht, ashtu sikurse të gjitha federatat e tjera.

“Federata e Kickboxit, Federata e Futbollit dhe Federata e Shahut të Kosovës, janë federatat të cilat së fundmi janë licencuar në MKRS në përputhje me standardet e reja të qeverisjes së organizatave sportive. Sikur edhe të gjitha federatat e tjera të licencuara më herët, edhe këto të trija, kanë marr licencën me kusht”, shkroi Osmani në “Facebook”.

Licencimi me kusht nënkupton që federatat e sportit të Kosovës janë të obliguara që brenda 90 ditësh të plotësojnë kriteret e licencimit edhe për klubet e tjera anëtare, të cilat gjatë kësaj faze nuk kanë arritur të përmbushin kërkesat e parapara me udhëzim administrativ.

Deri tani janë licencuar 26 federata nga MKRS, kurse afati i licencës është deri më 31 dhjetor të vitit 2024.

Postimin e plotë të Daulina Osmanit e gjeni më poshtë.