Rio Ferdinand beson se nuk duhet të ketë krahasime mes mesfushorit të Manchester United, Casemiro dhe atij të Arsenalit, Thomas Partey, pavarësisht se ky i fundit po kalon një sezon fantastik.

Ferdinand thotë se Casemiro e fshin Parteyn me ndikimin e tij në lojë, duke përmendur statistikat si bazë për argumentin e tij, para ndeshjes mes Arsenalit dhe United këtë të diele, raporton KosovaPress.

“Unë mendoj se rëndësia për skuadrat e tyre... ju mund të argumentoni të dyja palët në mënyrë të barabartë. Por më pas, kur ju shihni përmes statistikave, Casemiro e fshin atë”, tha Ferdinand në “Vibe with Five Podcast”.

Ish-mbrojtësi i Manchester United nuk beson se Partey mund të bëjë punën që po e bënë Casemiro te skuadra e Erik ten Hag.

“Unë nuk mendoj se ai ka ndikim në mbrojtje për United, por në top ai po bën më shumë”, tha Ferdinand.

Megjithatë, Ferdinand e lavdëroi Parteyn për paraqitjet fantastike këtë sezon.

“Me top, ai po bënë më shumë. Ai po e dirigjon lojën për Arsenalin. Ai po bën pasime që nuk e kam ditur që mund t’i bëjë. Aftësia e tij e pasimit është e pabesueshme”, tha Ferdinand.

Casemiro ka qenë një lojtar kyç për United nën drejtimin e Erik ten Hag, pasi iu bashkua United për 75 milionë euro nga Real Madridi në verë. Ylli brazilian, 30 vjeçar, ka pesë asistime dhe dy gola në 27 paraqitjet e tij për “Djajtë e Kuq” këtë sezon, dhe ka pasur një ndikim të konsiderueshëm në mesfushë.

Partey ka qenë gjithashtu pjesë kyçe në gjysmën e parë të sezonit të shkëlqyer të Arsenalit, me “Topçinjtë” që kanë fituar 15 nga 18 ndeshjet e tyre të para në Premier Ligë.

Si Casemiro ashtu edhe Partey do të kenë mundësinë të shkëlqejnë përsëri kur skuadrat e tyre përballen për herë të dytë këtë sezon, ndërsa Arsenali kërkon të rrit diferencën prej tetë pikësh në krye të tabelës së Premier Ligës.