*Foto e gjeneruar me AI

Serbia dhe Gjeorgjia nuk janë aleate të vërteta të Shteteve të Bashkuara, por regjime autoritare që po përpiqen të sigurojnë mbështetjen e administratës së presidentit amerikan Donald Trump, ndërsa në të njëjtën kohë forcojnë lidhjet me Rusinë dhe Kinën. Kështu kanë vlerësuar analistet me shtetësi amerikane Ivana Stradner dhe Katie Korkya, në një analizë të publikuar në FDD (Foundation for Defense of Democracies).

Në një analizë të publikuar me titull “Serbia dhe Gjeorgjia nuk janë miqtë tanë – janë regjime autoritare që kërkojnë afrim me Trumpin”, Stradner dhe Korkya thonë se presidenti serb Aleksandar Vuçiq dhe partia në pushtet në Gjeorgji, Georgian Dream, kanë ndjekur një model të ngjashëm të dobësimit të institucioneve demokratike, kufizimit të mediave të pavarura dhe shoqërisë civile, si dhe zhvillimit të marrëdhënieve më të ngushta me Moskën dhe Pekinin.

Aty thuhet se Vuçiqi dhe Georgian Dream nuk janë miq të Shteteve të Bashkuara, porse autoritarë që shtypin qytetarët e tyre dhe bashkëpunojnë me kundërshtarët e Amerikës.

Sipas analizës, vizita e fundit e Vuçiqit në Tbilisi nuk kishte rëndësi të veçantë ekonomike, pasi shkëmbimet tregtare mes dy vendeve mbeten minimale, por kishte një domethënie të qartë politike.

“Legjitimiteti i përbashkët është më i lehtë të ndërtohet mes dy regjimeve autoritare me të njëjtin mendim sesa të fitohet nga qytetarët e tyre ose partnerët perëndimorë”, shkruajnë analistet.

Ato rikujtojnë se Serbia dhe Gjeorgjia refuzuan t’i vendosin sanksione Rusisë pas pushtimit të Ukrainës, ndërsa kanë thelluar bashkëpunimin strategjik me Kinën përmes investimeve, marrëveshjeve ekonomike dhe projekteve infrastrukturore.

Stradner dhe Korkya theksojnë se, pavarësisht këtyre politikave, të dyja qeveritë po përpiqen të afrohen me administratën Trump. Sipas tyre, Beogradi po promovon një dialog strategjik me Uashingtonin, ndërsa Tbilisi ka kërkuar një rifillim të marrëdhënieve me SHBA-në.

“Vuçiqi dhe Georgian Dream nuk janë miq të Shteteve të Bashkuara. Ata janë autoritarë që shtypin qytetarët e tyre dhe bashkëpunojnë me kundërshtarët e Amerikës, ndërsa vazhdojnë të përfitojnë nga partneriteti me Perëndimin”, thuhet në analizë, transmeton KosovaPress.