Ekonomia e Eurozonës u përshpejtua pak në tremujorin e tretë, me ritmin e punësimit të përgjysmuar, treguan sot të dhënat nga Eurostati.

Sipas entit të statistikor të BE-së, ekonomia në Eurozonë u rrit gjatë këtij tremujori 0.4 për qind krahasuar me tremujorin paraprak kur shënoi rritje 0.2 për qind.

Norma e rritjes në periudhën korrik-shtator është më e larta qe nga vera e vitit 2022, sipas Eurostat. Në nivel të BE-së, aktiviteti është rritur 0.3 për qind, krahasuar me periudhën prill-qershor.

Në nivel vjetor, ekonomia e Eurozonës u rrit në tremujorin e tretë 0.9 për qind, pas rritjes 0.6 për qind në tre muajt e mëparshëm. Në BE, rritja ishte pak më e fortë, sipas një norme rritjeje paksa të rritur, në 1 për qind. Në tremujorin e pranverës ishte 0.8 për qind.

Ekonomia e Spanjës shënoi rritjen më të madhe në tremujorin e tretë me bazë vjetore 3.4 për qind. Franca shënoi rritje të aktivitetit 1.3 për qind dhe Italia 0.4 për qind. Gjermania, ndërkaq, shënoi rënie 0.2 për qind.

Në nivel tremujor, Irlanda regjistroi rritjen më të fortë të produktit të brendshëm bruto 2 për qind. Hungaria dhe Suedia rrëshqitën në recesion, pasi aktiviteti ekonomik gjatë verës u reduktua për të dytin tremujor radhazi. Grupi përfshin gjithashtu Letoninë, e cila është në recesion qe nga fillimi i vitit.

Eurostati nuk kishte të dhëna për Kroacinë, Danimarkën, Greqinë, Luksemburgun dhe Maltën.

Numri i të punësuarve në eurozonë është rritur në periudhën korrik-shtator 0.2 për qind krahasuar me tre muajt e mëparshëm kur u rrit 0.1 për qind. Në BE u rrit 0.1 për qind, me të njëjtin ritëm si në pranverë. Punësimi në Evropë ka qenë në kufijtë e stagnimit qe nga fundi i vitit të kaluar.

Në nivel vjetor, numri i të punësuarve në eurozonë u rrit në tremujorin e tretë 1 për qind, vetëm pak më shumë se në periudhën prill-qershor.

Të dhënat për BE-në tregojnë një përkeqësim të lehtë, sipas rritjes së numrit të të punësuarve gjatë verës me 0.8 për qind krahasuar me të njëjtën periudhë të vitit të kaluar. Në tremujorin e dytë u rrit 0.9 për qind.