Dy minatorët e lënduar ende nën kujdes mjekësor, të tjerët lirohen për në shtëpi
Dy nga trembëdhjetë minatorët e lënduar sot në Minierën e Trepçës, vazhdojnë të mbeten nën kujdesin mjekësor në Spitalin e Përgjithshëm në Mitrovicë.
Ministri i Shëndetësisë Arben Vitia ka bërë të ditur se 11 minatorë pasi morën trajtimin shëndetësor janë liruar nga spitali në gjendje të mirë shëndetësore.
“Dy të tjerë, të cilët kanë lëndime në sy, janë ende nën mbikëqyrje dhe kujdesin mjekësor të mjekëve dhe infermierëve, si dhe janë jashtë rrezikut për jetën”, ka shkruar Vitia në Facebook duke iu uruar minatorëve të lënduar shërim e rikthim të shpejtë në familje.
Ndryshe, 13 minatorë janë lënduar si pasojë e rrjedhjes kimike të acidit sulfurik rreth orës 13:00.
Dy prej tyre kanë pasur lëndime serioze të syve djegie kimike me acid sulfurik, të cilët pas trajtimit në Emergjencë janë transferuar në repartin e Oftalmologjisë së Spitalit të Mitrovicës. Ndërsa, 11 të tjerë pas trajtimit në Emergjencë janë liruar për në shtëpi.
12 minatorë lëndohen nga rrjedhja kimike, dy prej tyre me lëndime serioze • KosovaPress
