Pasi pa skuadrën e tij të eliminohej nga Liga e Kampionëve kundër PSG-së, drejtori ekzekutiv i Bayern Munich, Jan-Christian Dreesen, vuri në dyshim emërimin e João Pinheiro si gjyqtar i ndeshjes.

Bayern Munich u frustrua nga disa vendime kyçe të marra nga gjyqtari João Pinheiro, teksa u eliminua me rezultatin e përgjithshëm 6-5 nga PSG, pas një barazimi 1-1 në ndeshjen e dytë gjysmëfinale të Ligës së Kampionëve.

Dy nga incidentet më të diskutueshme të ndeshjes ndodhën në pjesën e parë.

Së pari, Nuno Mendes i PSG-së i shpëtoi kartonit të dytë të verdhë për prekje me dorë, pasi gjyqtari fishkëlloi për një faull të Bayernit.

Pak më vonë, João Vitinha i PSG-së largoi topin, i cili goditi shokun e skuadrës João Neves në krah brenda zonës së penalltisë. Stoli i Bayernit apeloi për një penallti, por VAR nuk ndërhyri për shkak të rregullit për prekjen aksidentale me dorë midis shokëve të skuadrës.

Duke folur për Sky Germany pas ndeshjes, drejtori ekzekutiv i Bayernit, Jan-Christian Dreesen, sugjeroi që gjyqtari João Pinheiro nuk kishte përvojën e nevojshme për të arbitruar një ndeshje në këtë nivel.

“Është e habitshme, për të mos thënë më shumë, që një gjyqtar me vetëm 15 paraqitje në Ligën e Kampionëve lejohet të drejtojë një ndeshje të tillë. Dhe kjo ndoshta shpjegon edhe disa nga vendimet”, tha Dreesen.

KosovaPress