Drejtorët e Interit dëgjohen nga Komisioni Anti-Mafia
Sipas “Il Fatto Quotidiano”, Komisioni Anti-Mafia në Milano dëgjoi dy drejtorë të Interit sa i përket lidhjes midis anëtarëve të Curva Nord dhe krimit të organizuar.
Komisioni Anti-Mafia dëgjoi të premten në Milano avokatin Adriano Raffaelli, president i bordit mbikëqyrës të Interit dhe menaxherin e sigurisë së klubit, Gianluca Cameruccio, raporton KosovaPress.
Asnjë përfaqësues i Interit nuk është nën hetim, por thuhet se ishte hera e parë që një komision i tillë dëgjonte përfaqësues të një klubi të Serie A.
Sipas raportit, drejtorët e Interit u përballën me pyetje në lidhje me përfaqësuesit e Curva Nord Milano dhe lidhjet e tyre me mafian 'ndrangheta, veçanërisht pasi Antonio Bellocco, tashmë i dënuar në një gjyq mafioz në Itali, u emërua ndër drejtuesit e rinj të Curva Nord këtë janar.
“Il Fatto Quotidiano” pretendon se Komisioni Anti-Mafia gjithashtu donte të sqaronte marrëdhëniet e klubit me Curva Nord dhe aktivitetet e biznesit rreth stadiumit para ditëve të ndeshjeve, duke përfshirë parkimin e makinave dhe sallat e ushqimit.