Anëtari serb i Presidencës së BeH, Milorad Dodik deklaroi sot se lufta në Ukrainë dhe efektet e saj negative i kanë detyruar krerët serbë të Bosnjës të shtyjnë planet për tërheqjen e rajonit të tyre nga institucionet kombëtare të Bosnje e Hercegovinës.

Në dhjetor, Parlamenti i Republikës Serbe votoi për të shkëputur lidhjet me forcat e armatosura të Bosnjës, gjyqësorin dhe sistemin e taksave, në një propozim jodetyrues që do t'i hapte rrugën shkëputjes.

Dodik - forca shtytëse pas një plani që shkaktoi krizën më të keqe politike në Bosnje që nga fundi i luftës së viteve 1990 dhe filloi sanksionet kundër tij nga Londra dhe Uashingtoni dhe paralajmërimet e BE - tha se ai do të zbatohej brenda afatit të fundit të kësaj jave.

Megjithatë, kushtet e ndryshuara politike të shkaktuara nga lufta në Ukrainë kanë çuar në vonesa, tha Dodik, planet e të cilit mbështeten nga Moska.

Plani secesionist nuk është anuluar, por vetëm është shtyrë, tha Dodik gjatë një sesioni parlamentar që ai mblodhi për të fituar mbështetje kundër vendosjes së sanksioneve ndaj Rusisë për pushtimin e Ukrainës.

“Prandaj ne kemi ndaluar realizimin e konkluzioneve tona në lidhje me tërheqjen e (serbëve të Bosnjës) nga organet shtetërore”, tha Dodik.