Djali i Driton Kukës i sjell medalje Kosovës nga Evropiani i xhudos
Trajneri i ekipit kosovar të xhudos, Driton Kuka ka bërë të ditur se i biri i tij, Joni ka fituar medalje në Kupën Evropiane për Shpresa U15, që po mbahet në Sarajevë të Bosnje dhe Hercegovinës.
Në kuadër të kategorisë deri në 46 kilogramë, Jon Kuka i ka sjellë Kosovës medalje nga Evropiani i xhudos për Shpresa U15, raporton KosovaPress.
Joni ishte në shoqërinë e trajnerëve Majlinda Kelmendi dhe Fatos Tabaku, dhe pas medaljes së fituar Driton Kuka ka reaguar në “Facebook” ku ndër të tjera u shpreh i kënaqur që ish-garuesit e tij po ia kthejnë borxhin me medalje me nxënësin dhe djalin e tij, Jonin.
“Për miqtë e vërtetë… Një lajm i mirë për Kosovën nga Sarajeva! Jon Kuka 46 kg. Medalja e parë në gara zyrtare! Kupa Evropiane për Shpresa U15. Ndjenjë e mirë e veçantë që Majlinda e Fatosi si ish-garues të mi sot po fillojnë të më kthejnë borxhin me medalje me nxënësin e tyre, djalin tim Jonin!”, shkroi Kuka.
