Dështon mbledhja e kryesisë, të mërkurën seancë për arrestimin e kryeshefit të KEK-ut
Lexohet për: 2 min.
1 vit më parë
Linku u kopjua
Të mërkurën do të mbahet seancë e jashtëzakonshme, e cila është thirrur nga opozita. Nga ora 11:00 do të debatohet për arrestimin e kryeshefit të KEK-ut, Nagip Krasniqi. Për këtë të fundit dhe gjithë bordin, Partia Demokratike e Kosovës po kërkon shkarkim. Mbledhja e sotme e kryesisë ka dështuar, në mungesë të kuorumit.
Shefja e deputetëve të shumicës, Mimoza Kusari Lila, tha se është tendencioze, qasja e opozitës në lidhje me hetimet që po zhvillohen për rastin në KEK.
Më tej, ka shtuar se përzierja në fakte nuk lejohet as me Ligjin për Hetim Parlamentar.
Kusari-Lila theksoi se grupi parlamentar i LVV-së, ka dy deputete që janë në pushim të lehonisë, e dy të tjerë që abstenojnë vazhdimisht.
Në anën tjetër, shefi i Grupit Parlamentar të PDK-së, Abelard Tahiri tha se mazhoranca nuk po arrin të ketë shumicën minimale që të kalojnë projektligjet e pika të tjera të rendit të ditës.
Tahiri tha se të mërkurën do të ketë seancë të jashtëzakonshme në lidhje me arrestimin e kryeshefit të KEK-ut, Nagip Krasniqi.
Për më tepër, Tahiri tha se Krasniqi dhe bordi i KEK-ut duhet të shkarkohen.
