Stabilitet institucional përmes zgjedhjes së presidentit u kërkua në Komisionin parlamentar për integrime evropiane para thirrjes për diskutim të ambasadorëve të vendeve të Bashkimit Evropian për rrugën evropiane të Kosovës.

Në diskutimin që ky komision bëri të mërkurën për planin e punës, u tha se ka shqetësim mes deputetëve se sa do të jetë jetëgjatësia e legjislaturës së dhjetë pas mospajtimeve të partive politike për ta zgjedhur presidentin. Pasi kanë mbetur edhe 27-të ditë afat kushtetues për ta zgjedhur të parin e vendit, deputetët, anëtarë të këtij komisioni, thanë se shpresojnë që të gjendet një zgjidhje për kryetarin e shtetit.

Kryetarja e komisionit, njëherësh deputete e Lidhjes Demokratike të Kosovës, Hykmete Bajrami, u shpreh skeptike që ambasadorët do t’i përgjigjen pozitivisht ftesës së komisionit për diskutim, pasi sipas saj çështja e stabilitetit institucional është kusht për secilin hap të integrimit në union.

“Ambasadorët i thërrasim pasi të zgjedhim presidentin. Për besë nuk e besoj as që na vizitojnë. Çështja e stabilitetit institucional është gati kusht për secilin hap në integrim evropian. Unë po shpresoj shumë që ne kemi arritur me zgjedh... Është prioritet mbi prioritete, pasi ne kur po e planifikojmë punën, asnjëri nuk po jemi të sigurt, pasi po e dimë ngërçin që ka ndodhur muajin e kaluar dhe po e dimë që Kuvendi i Kosovës s’ka qenë aktiv prej dhjetorit të vitit 2024. Ky është një lloj shqetësimi, pasi nëse s’kemi hapa konkretë, sa do të jetë jetëgjatësia e kësaj legjislature? Unë kam frikë që duket joserioze edhe ftesa nga ana jonë”, tha ajo.

Mirëpo, deputetja e partisë në pushtet, Lëvizjes Vetëvendosje, Liza Gashi, tha se ata janë të hapur për të zgjedhur presidentin.

“Ne jemi të hapur me zgjedh presidentin. Unë po gëzohem që kjo është prioritet”, shtoi ajo.

Duke iu kundërpërgjigjur deputetes së mazhorancës, Hykmete Bajrami fillimisht tha se po shpreson që të gjithë deputetët të bëjnë një zgjidhje për presidentin, e më pas e ndryshoi deklarimin e saj duke iu drejtuar deputetes së LVV-së me fjalët: po shpresoj që keni me mundur me bo ndonjë zgjidhje.

“Po shpresojmë që kemi me mujt me bo ndonjë zgjidhje. Keni me mujt me bo ndonjë zgjidhje. Së bashku”, theksoi ajo.

Në anën tjetër, ajo foli edhe për mbarëvajtjen e punës së këtij komisioni, ku shtoi se është e nevojshme që kryenegociatori i Kosovës për integrim në BE, Jeton Zulfaj, të shkojë për raportim në komision.

“Caktimi i ministrave në raportim apo vizitat në ministri të ndodhin pas takimit me kryenegociatorin, ku ne prej tij do të kërkonim agjendën e reformave rreth planit të rritjes dhe zbatimit të të gjitha kushteve. Të shohim pastaj se cila prej ministrive ka bërë progres ose ka ndonjë ngecje në realizimin e programit të reformave”, tha Bajrami.

Kërkesë të ngjashme parashtroi edhe deputetja e AAK-së, Time Kadrijaj, e cila e konsideroi të nevojshme transparencën në këtë proces.

“Ajo çka është me rëndësi, kryenegociatori duhet me qenë transparent dhe të vijë para komisionit të raportojë, ndoshta edhe para fillimit të negociatave, dhe të bëhet e ditur se cila është agjenda e diskutimit e ndonjë takimi që mbahet, qoftë bilateral apo trilateral në Bruksel”, deklaroi ajo.

Pas këtij diskutimi, deputetët miratuan agjendën e punës së këtij komisioni.

/Kosovapress/