Deputetja e Partisë Demokratike të Kosovës, Blerta Deliu-Kodra, tha se Qeveria Kurti po e ngatërron koordinimin me aleatë me servilizëm. Ajo e quajti të turpshme qasjen e ekzekutivit, dhe sipas saj po mashtrohet populli.

Në debatin parlamentar për situatën në veri, Deliu-Kodra deklaroi se kryetari i veriut të Mitrovicës, Erden Atiq jeton në Fushë Kosovë.

"Dhe kjo është e turpshme kur Qeveria e Kosovës e ngatërron koordinimin e partneritet mes Kosovës dhe Shteteve të Bashkuara të Amerikës me servilizëm. Keni parasysh deri ku shkon mashtrimi i tyre”, tha deputetja e PDK-së.

Ajo shtoi se shtrirja e sovranitetit dhe integritetit në veri nuk mund të bëhet pa koordinimin me partnerët ndërkombëtarë.

“Informatat e mia të konfirmuara për kryetarin e zgjedhur nga radhët e LVV-së, Erden Atiqin, janë që i njëjti është banor i Fushë Kosovës. Gjatë gjithë ditës, janë informata zyrtare të cilat i kam të konfirmuara, kryeministri na hodhi perde syve për të thënë që ai po e kryen detyrën e tij në veri si kryetar i zgjedhur", shtoi ajo në debatin parlamentar për veriun.

Tutje, ajo konsideroi se çfarë ka ndodhur në veri, e kthen Kosovën para shpalljes së Pavarësisë.