Kroacia pësoi një humbje të rëndë 3:0 ndaj Spanjës në hapjen e Kampionatit Evropian në Berlin.

Faktori vendimtar ishte pjesa e parë, në të cilën spanjollët shënuan tre gola dhe siguruan fitoren.

Trajneri kroat Zlatko Daliq para ndeshjes së ardhshme në grupin B kundër Shqipërisë, e cila pësoi mbrëmë nga Italia 1:2, ka paralajmëruar ndryshime.

“E pashë të gjithë lojën. Shqipëria kaloi në epërsi, ishte një kundërshtar i barabartë dhe në fund pati një shans për 2:2. Nuk duhet t'i nënvlerësojmë, ata kanë energji të madhe dhe nuk ishin shumë më keq se italianët. Ishin cilësorë, u përpoqën dhe nuk duhet t'i nënvlerësojmë. Megjithatë, varet nga ne se si do të luajmë. Ne do të kemi dominim dhe do të duhet të dimë ta zgjidhim këtë lojë”, ka thënë Daliq.

Përballja e Kroacisë kundër Shqipërisë është “të jesh apo të mos jesh”, por Daliq thotë se nuk do të fundosen.

“Gjithçka është ende në dorën tonë, ne vendosim vetë dhe më takon mua t'i kthej të gjitha këto dhe të vë në dukje të këqijat. Sot do të analizojmë Shqipërinë, do të provojmë diçka ndryshe në atë ndeshje dhe do të thotë shumë për ne. Në thelb, ne duhet të fitojmë dhe kështu duhet të përgatitemi dhe të bëjmë ndryshime. Nuk mund të flas ende për detaje, por duhet të ndryshojmë disa gjëra në qasje, gjë që nuk ishte e mirë. Kemi dy ndeshje përpara, gjithçka është në dorën tonë dhe nuk duhet të fundosemi dhe të humbim energji”, ka thënë ai.

Kroacia e Shqipëria përballen më 19 qershor në Hamburg, duke filluar nga ora 15:00.