Shqipëria do të ketë Agjencinë Kombëtare për Mbrojtjen Kibernetike si dhe Njësinë speciale të kontrollit detar gjatë sezonit veror në 2023. Të dyja këto zhvillime të reja për sigurinë në vend dhe Policinë e Shtetit janë parashikuara në buxhetin e 2023. Ministri i Brendshëm, Bledi Çuçi në përmbledhje të arritjeve dhe objektivave për 2022 tha se Shqipëria do të ketë teknologjinë më të fundit të mbrojtjes kibernetike në rajon.

“Sulmi kibernetik në shtator ka sjellë forcimin e teknologjisë dhe me buxhetin e 2023 do rrisim 7.6 herë investimet në fushën e teknologjisë për policinë e shtetit. Do ngremë agjencinë kombëtare për mbrojtjen kibernetike dhe të gjitha këto janë investime të reja nga buxheti i 2023. Sulmet kibernetike janë një sfidë që e kalon e gjithë bota dhe askush nuk është 100 % i mbrojtur, por me masat që kemi marrë besoj se në përfundim të ngritjes së kësaj agjencie dhe në bashkëpunim me partnerët ndërkombëtarë do të kemi infrastrukturën më të mirë në rajon për mbrojtjen kibernetike”, tha Çuçi.

Ministri foli edhe për ngritjen e njësisë së përbashkët të kontrollit detar, ku sipas tij do të sigurojë një sezon turistik më të sigurt për pushuesit.

“Krijimi i një njësie të përbashkët speciale të kontrollit detar, duke parashikuar kapacitetet njerëzore dhe për pajisjen me 40 motora uji nga buxheti 2023, ku gjatë sezonit turistik do patrullojë në brigjet e Shqipërisë për të garantuar sa më shumë siguri. Vjet për herë të parë në historinë e policisë shqiptare kemi krijuar njësinë speciale alpine në bashkëpunim me policinë austriake”, tha Çuçi.

Ministri i Brendshëm theksoi se gjatë 2022 është jetësuar reforma në policinë kriminale, e cila do të krijojë strukturë të veçantë brenda policisë duke ndarë krimet e lehta nga krimi i organizuar dhe trafiku i narkotikëve.

“Ka qenë një vit me sfida jo të pakta, por edhe me arritje të rëndësishme për sigurinë. 2022 ka qenë një vit i mbushur me sfida dhe pjesa kryesore që ka mbuluar Ministria e Brendshme lidhet me funksionimin e Policisë së Shtetit. Bëm një hap të rëndësishëm në reformimin e policisë dhe kemi arritur që në fund të 2022 të fillojmë jetësimin e reformës kriminale me qëllim që jo vetëm të rrisim  eficensën e policisë kriminale por për t’i dhënë identitet më të plot kësaj policie që lidhet me luftën kundër krimit. Pas një pune kolosale me ekspertë brenda vendit dhe ekspertizë të marrë nga partnerët tonë sidomos nga pala gjermane do ndajmë punën e policisë kriminale nga ato që quhen krime të lehta. Krimet që lidhen me fushën e narkotikëve, vrasje, krimin e organizuar që futen te kjo reformë kriminale, një reformë që ka qenë e rekomanduar nga partnerët tanë. Vetëm në 2022 bëmë hapin e parë drejt këtij ristrukturimi. Nga 2023 policia kriminale do të riorganizohet brenda vetës duke u shkëputur nga zinxhiri komandues duke u ndarë nga krimet e lehta dhe duke u fokusuar te krimi i organizuar. Kemi bërë strukturën e re, ku nga qendra gjatë 2023 do vijojmë me jetësimin edhe në nivel vendor. Kemi krijuar një drejtori të posaçme që do merret me fushën e narkotikëve, një drejtori me grupet e organizuar dhe një strukturë me krimet e rënda. Kjo do i jap një shtysë të madhe dhe do të shohim frytet kundër krimit të organizuar dhe trafikut të drogave”, tha Çuçi.

Një tjetër arritje i Ministrisë së Brendshme ishte edhe modernizimi i policisë shkencore dhe krijimi I databases me mostrat e ADN-së

“Gjatë 2022 modernizuam policinë shkencore duke fiksuar provat dhe skenat e krimit. Do të ngremë një godinë të re për policinë shkencore dhe më pas partnerët britanik na kanë vënë në dispozicion fondet për pajisjen me teknologjitë e fundit të policisë shkencore. Krijuam databasen me 11 mijë mostra të ADN-së”, tha ministri.

/rtsh.al/