Çmimet e naftës u rritën sot në tregjet ndërkombëtare drejt 94 dollarëve, mbështetur nga një rënie e dollarit dhe shqetësimet për ofertën pas deklaratës së ministrit të Arabisë Saudite se shitja e naftës nga stoqet po manipulon tregjet.
Në tregun e Londrës, çmimi i një fuçie ishte 40 centë më i lartë pas mesditës se në mbylljen e tregtisë së djeshme dhe arriti në 93.66 dollarë. Në tregun amerikan një fuçi u tregtua me 70 centë më shumë, me 85.28 dollarë.
Në tregtinë e mëngjesit, nafta ra më shumë se një dollar për shkak të shenjave të ngadalësimit të aktivitetit ekonomik në SHBA dhe Kinë, dy konsumatorët më të mëdhenj në botë.
Të dhënat e qeverisë kineze të publikuara të hënën treguan se importet e naftës së papërpunuar në shtator ishin dy për qind më të ulëta në bazë vjetore se në të njëjtin muaj të vitit të kaluar, duke vazhduar një tendencë të importeve më të dobëta, të shoqëruara me shitje më modeste me pakicë.
Aktiviteti i biznesit në SHBA ra në tetor për të katërtin muaj radhazi, me industrinë dhe kompanitë e shërbimeve që tregojnë për një kërkesë më të dobët, tregoi raporti mujor i S&P Global. Aktiviteti i biznesit ka shënuar rënie edhe në sektorët e prodhimit të Eurozonës dhe Mbretërisë së Bashkuar.
Drejtori ekzekutiv i bankës së investimeve Goldman Sachs David Solomon tha të martën se sipas mendimit të tij një recesion në SHBA është "shumë i mundshëm" dhe në Evropë mund të ketë ndodhur tashmë.
Pas mesditës, çmimet ndryshuan kursin ndërsa dollari u dobësua, duke mbështetur kërkesën nga blerësit me monedha të tjera.
Mbështetje për çmimet u dha edhe nga deklarata e ministrit saudit të Energjisë, Princit Abdulaziz bin Salman se rezervat e energjisë po përdoren si një mekanizëm për të manipuluar tregjet.
"Është detyra ime të bëj të qartë se humbja e stoqeve strategjike mund të jetë e dhimbshme në muajt në vijim," tha ai në konferencën Future Initiative Investment (FII) në Riad.
SHBA dhe partnerët e saj në Agjencinë Ndërkombëtare të Energjisë (IEA) kanë vendosur të lëshojnë 180 milionë fuçi naftë nga rezervat në treg për të frenuar rritjen e çmimeve.
Ministri saudit paralajmëroi gjithashtu se kostoja e rraskapitjes së kapaciteteve prodhuese do të ishte e lartë.
Organizata e Vendeve Eksportuese të Naftës (OPEC) dhe aleatët e saj vendosën së fundmi të ulin prodhimin nga nëntori me dy milionë fuçi në ditë nga niveli i synuar, duke zemëruar Uashingtonin, i cili u ka kërkuar atyre ta rrisin atë për të frenuar rritjen e çmimeve.
Reduktimi duhet të jetë më modest, me rreth 1 milion fuçi në ditë, pasi disa anëtarë nuk kanë përdorur kuota për shkak të investimeve të pamjaftueshme, sqarojnë disa analistë.
OPEC raportoi se një fuçi e shportës së naftës të anëtarëve të tij qëndroi në 92.17 dollarë të hënën, që do të thotë se çmimi i saj ishte pothuajse i pandryshuar nga fundi i javës së kaluar.
