Këshilltari i lartë në Departamentin Amerikan të Shtetit, Derek Chollet ka deklaruar të mërkurën se Asociacioni i komunave me shumicë serbe është çështje urgjente. 

Chollet në një takim me gazetarët nga Kosova, vlerësoi se zbatimi i Asociacionit ka marrë rëndësi më të madhe pas ngjarjeve të fundit veri të Kosovës.

Ai ka thënë se SHBA-të presin propozime konkrete në tryezën e dialogut me Serbinë.

“Themelimi  i Asociacionit të komunave serbe është një çështje urgjente. Dhe, është një çështje urgjente në agjendën e dialogut. Kjo ka marrë një rëndësi edhe më të madhe pas ngjarjeve të fundit në Veri. E kemi thënë privatisht dhe publikisht. Është një mesazh që e përsërita këtu sot. Ne presim që qeveria e Kosovës të vendosë disa propozime në tryezë. Unë thjesht dua të jem shumë i qartë, megjithatë, se ne nuk e mbështesim dhe nuk do ta mbështesim një marrëveshje si Republika Srpska”, tha Chollet.

Sipas numrit dy të Departamentit Amerikan të Shtetit, SHBA-të nuk po kërkojmë nga Kosova që  të mbështesë asnjë marrëveshje që nuk është në përputhje me ligjet dhe vendimin e Gjykatës Kushtetuese të vitit 2015.

“Parlamenti i Kosovës ka ratifikuar marrëveshjen e Brukselit dhe është vendosur që është e nevojshme të krijohet një asociacion të komunave me shumicë serbe dhe besojmë se ky asociacion është ligjërisht i detyrueshëm për qeverinë e Kosovës. Sot dëgjuam sërish se asociacioni është shumë i rëndësishëm për komunitetin serb, që të dëgjohet zëri i tyre dhe bën që të drejtat e tyre të jenë plotësisht të mbrojtura. Themelimi i asociacionit është diçka që ne e kemi avokuar në të gjitha nivelet e qeverisë për ta zbatuar dhe kemi b iseduar me palët e interesuara për këtë dhe do të vazhdojmë ta bëjmë”, tha tutje Chollet.

Ai ka bërë thirrje se marrëveshja duhet të arrihet sa më shpejtë që është e mundur. Chollet tutje ka deklaruar se ka parë një vullnet të fuqishëm të Qeverisë për të përvjelur mëngët në kuadër të procesit të dialogut, që sipas tij, i garanton Kosovës integrim në strukturat euro-atlantike.

Këshilltari i lartë në Departamentit amerikan të Shtetit, Derek Chollet pas takimeve të shumta me krerë institucional e liderë të partive politike në Kosovë, ka deklaruar se marrëveshja finale mes Kosovës e Serbisë në kuadër të dialogut, duhet të ketë në qendër njohjen reciproke.

“Dëshirojmë të thyejmë stagnimin ciklik. Nuk dëshirojme të jemi në një situatë të menaxhimit të krizave, siç ndodhi në kuadër të periudhës së Krishtlindjeve në veri. Kosova duhet të angazhohet për marrëveshje me Serbinë, e cila duhet ta ketë njohjen në qendër”, tha Chollet.

Ai mes tjerash ka treguar se me Kosovën e ka një lidhje të veçantë pasi kishte punuar për diplomatin tashmë të ndjerë, Richard Holbrook.  “Histori e gjatë e marrëdhënieve të mia personale me Kosovën. E duam Kosovën multietnike, sovrane dhe demomratike”, tha Chollet. /Gazeta10