Mesfushori veteran i Brazilit, Casemiro, ka deklaruar se kombëtarja e tij nuk hyn si favoritja kryesore për të fituar Kupën e Botës 2026, por beson se kjo mund të jetë një avantazh për “Seleçaon”.

“Ne nuk jemi favoritët e mëdhenj. Ndoshta këtë herë jemi një hap prapa, por kjo na mban vigjilentë dhe kjo është gjithmonë diçka pozitive”, tha Casemiro.

34-vjeçari pranoi se Brazili ka kaluar një periudhë të vështirë me ndryshime në pankinë dhe në drejtimin e federatës, por shprehu besim te skuadra e drejtuar nga Carlo Ancelotti.

“Kemi lojtarë cilësorë, me përvojë, energji dhe të rinj. Mendoj se kemi përzierjen e duhur për këtë kompeticion”, shtoi ai.

Brazili synon titullin e gjashtë botëror në histori dhe do ta nisë aventurën në Grupin C, ku do të përballet me Marokun, Haitin dhe Skocinë.

KosovaPress