Mijëra britanikë janë në radhë në qendër të Londrës sonte për të nderuar Mbretëreshën Elizabeth II, duke e ditur se mund t'u duhet të presin me orë të tëra.

Disa prej tyre kanë fjetur në trotuar gjatë natës, duke u përballur me shiun, për të siguruar vendin e tyre në vijën që shtrihej nga Westminster Hall deri në 15 kilometra, raportojnë agjencitë.

Togat e nderit dhe Big Ben tingëllonin çdo minutë gjatë udhëtimit të fundit të Mbretëreshës Elizabeth II nga Pallati Buckingham në Westminster Hall.

Zyrtarët e qeverisë nuk mund të specifikojnë se sa njerëz janë duke pritur në radhë, por besohet se deri në orën 16:00 ishin 750 mijë.

Kryepeshkopi i Jorkut, Stephen Cottrell, duke iu drejtuar atyre që prisnin, tha se ata po festonin dy tradita të mëdha britanike - "dashurinë për Mbretëreshën dhe dashurinë për radhët".

Mes të mbledhurve ka nga ata që kanë mbërritur në emër të prindërve të tyre të moshuar, ata që duan të jenë pjesë e historisë dhe ata që duan të falënderojnë gruan që është në pushtet që nga viti 1952 dhe ka kryer detyra zyrtare edhe dy ditë para se të ndahej nga jeta.

“Ajo na dha 70 vjet të jetës së saj”, tha Jacquie D'Arcy, një 63-vjeçare banore e Essex-it, e cila ka pritur në radhë që nga mbrëmë.

“Është e rëndësishme të bëj homazhe për mbretëreshën e ndjerë. Dhe prindërit e mi e duan familjen mbretërore dhe nuk mund të jenë atje. Pra është e dyfishtë, kam ardhur për nënën dhe babanë tim, por edhe për veten time”, tha D’Arcy.

Mark Bonser, 59-vjeç, nga Doncaster, tha se Mbretëresha ishte nëna e dytë e të gjithëve.

“Ajo na dha 70 vjet të jetës së saj. Jam i sigurt se mund të jap 24 orë nga jeta ime për ta respektuar atë”, tha ai.

Ceremonia në Londër do të zgjasë gjithsej pesë ditë dhe përfundon në ditën e funeralit të Mbretëreshës.

Qindra-mijëra njerëz që do t'i bashkohen radhës do të presin përgjatë bregut jugor të Thames, pranë monumenteve të Londrës si London Eye.

Ata që i bashkohen radhës u jepet një rrip dore me ngjyrë me një numër që i lejon ata të largohen nga radha për të shkuar në tualet ose për të marrë ushqim e pije.

Janë gjithashtu një mijë vullnetarë dhe policë, dhe është përgatitur ndihma mjekësore për ata që do të duhet të presin shumë.