Kandidati për deputet nga radhët e LDK-së Besim Mulaj ka deklaruar se tendenca për të manipuluar me votat e diasporës nga ambasadori i Kosovës në Kroaci Martin Berishaj, nuk është asgjë tjetër veçse shenjë paniku nga humbja e madhe që e pret Lëvizjen Vetëvendosje dhe kryeministrin në ikje Albin Kurti.
Në një postim në Facebook, Besim Mulaj ka shkruar se “kur vota nuk mund të fitohet me mbështetje të sinqertë, atëherë provohet të sigurohet përmes skemave të dyshimta, por gjithçka ka një kufi.”
“Martin Berishaj, i përfolur më herët për përfshirje në afera energjetike dhe transaksione të dyshimta financiare, tani del në dritë si i përfshirë edhe në manipulime zgjedhore. Kjo vetëm sa e konfirmon atë që dihet tashmë: njerëzit që kanë shfrytëzuar pushtetin për përfitime personale nuk ndalen vetëm me një skandal, por e vazhdojnë rrugën e tyre të errët sa herë që ndihen të rrezikuar”, ka shkruar Mulaj.
Për më tepër, Mulaj thotë se përpjekja për të ndikuar në votën e diasporës nuk është vetëm një shkelje ligjore, por edhe një fyerje për qytetarët që jetojnë jashtë dhe që e marrin me shumë seriozitet të drejtën e tyre demokratike.
“Këta qytetarë, të cilët kontribuojnë ekonomikisht dhe me përkrahje për Kosovën, nuk mund të përdoren si instrumente politike nga ambasadorë të dërguar për të shërbyer jo popullin, por pushtetin”, ka thënë ai.
Mulaj thotë se paniku është i qartë për Lëvizjen Vetëvendosje, pasi zgjedhjet e 9 shkurtit nuk janë më një garë për fitore, por betejë për mbijetesë politike për ata që menduan se do të sundojnë përjetësisht.
