KH Besa Famgas fitoi me rezultat bindës ndeshjen e parë gjysmëfinale të “PlayOff-it” kundër KH Vushtrrisë. Ndeshja u zhvillua të enjten pasdite në palestrën "Karagaçi" në Pejë, dhe KH Besa triumfoi me rezultatin 33:23.

Skuadra pejane nisi ndeshjen mirë dhe arriti të merrte një avantazh të hershëm me serinë 3:0. Rezultati vazhdoi të shtohej me shifrat 5:2. Mysafirët nga Vushtrria u afruan në një gol, me rezultatet 6:5 dhe 7:6. Megjithatë, KH Besa mori sërish iniciativën dhe u shkëput në rezultatin 11:6. Pas kësaj, skuadra mysafire nuk arriti më të afrohej në rezultat, raporton KosovaPress.

Në pjesën e dytë të ndeshjes, KH Besa Famgas vazhdoi të mbante epërsinë e saj me konsistencë. Denis Shabanoviq shënoi tetë gola për skuadrën pejane, ndërsa Egzon Gjuka dhe Arbios Mushkolaj shënuan shtatë gola secili. Ardit Tafila i shtoi katër gola në listën e shënuesve për KH Besën.

Te KH Vushtrria, Felippe Teixeira shënoi gjashtë gola, ndërsa Nemanja Drakuloviq shënoi pesë herë. Egzon Ademi dhe Bozhidar Nikoçeviq shënuan përkatësisht katër dhe tre gola.

Ndeshja e dytë e gjysmëfinales zhvillohet të dielën në mbrëmje në Vushtrri. KH Besa Famgas konsiderohet favorit i madh që pas dy ndeshjeve të luajtura të siguroj një vend në finalen e “PlayOff-it”.

Rezultati final i ndeshjes, 33:23 në favor të KH Besa Famgas.