Balotelli drejt rikthimit në Serie-A
Burime në Francë bëjnë me dije se Mario Balotelli dëshiron të largohet nga Adana Demirspor për një rikthim në Serie A, me Udinesen, Salernitanan dhe Empolin që janë skuadra të interesuara për shërbimet e tij.
33-vjeçari është nën kontratë në Turqi vetëm deri më 30 qershor, megjithëse ekziston edhe një opsion për ta vazhduar edhe një vit.
Ai e kishte nisur mirë sezonin me tre gola në pesë ndeshje të Super Ligës Turke, por më pas iu desh të operohej për një dëmtim në gju në nëntor, përcjellë KosovaPress.
“Footmercato” pretendon se Balotelli është gati të largohet nga Adana Demirspor dhe do të favorizonte një kalim në Serie A, duke shpresuar që të fitonte një vend në skuadrën e Italisë për EURO 2024.
Janë tre klube që besohet se po vlerësojnë idenë e marrjes së SuperMarios, me Salernitanan të trajnuar nga Pippo Inzaghi një opsion interesant, veçanërisht pasi Boulaye Dia është i lënduar..
Udinese është një tjetër alternativë, pasi po ka shumë vështirësi në shënimin e golave.
Klubi i tretë thuhet të jetë Empoli, i cili është në zonën e rënies dhe ka Francesco Caputon të lidhur me një kalim te Spezia .
