Kosova ka shënuar një hap historik në industrinë automobilistike me hapjen e qendrës më të madhe të prodhuesit suedez Volvo në Ballkan nga Auto Mita, një ngjarje që nuk është vetëm një arritje për kompaninë, por edhe për vendin. Ky investim i madh, që vendos Kosovën në hartën globale të Volvo-s, do të ndihmojë edhe për një ambient më të pastër në të mirën e qytetarëve.

Me një ceremoni madhështore, Auto Mita ka bërë prezantimin e modelit EX90- Volvo, i cili është vlerësuar si një nga shpikjet më të mira të vitit.

Drejtori në këtë auto-sallon, Zgjim Mita ka theksuar se Volvo ka marrë një qasje të jetë pionier i elektrifikimit të veturave dhe mbrojtës së ambientit.

“Si çdo i ri e kam dashtë Volvo, e kam ëndërruar Volvo dhe kam pasur synim të vijë deri këtu. 25 vjet përpara, unë kam qenë 11-vjeçar, Kosova e ka kryer periudhën e luftës, të shohësh një Volvo në rrugë ka qenë arritje, dhe sot të përurohet qendrën më të madhe të Volvo në regjion tregon kapacitetet që kemi ne kosovarët - nuk njohim inferioritet. Në këtë mënyrë jemi shumë krenarë që e kemi vendosur Kosovën në hartën fantastike të Volvo globalisht...Kanë filluar katër vjet përpara (negociatat, pritjet e menaxhmentit të Volvo), kanë zgjatur dy vjet...Volvo ka marrë një qasje të jetë pionier i elektrifikimit të veturave, të mbrojë ambientin, sepse e ka prioritet të mirën e njerëzimit. Mendoj se në bashkëpunim me ministren e MINT-it ka zhvillime që elektrifikimi të ndodhë në Kosovë, andaj gjenerata e re e veturave të elektrifikuar ose komplet elektrike do të jetë sfida e radhës për të sjellë këtu. Çfarë kemi bërë ne, i kemi instaluar pesë mbushës elektrikë pa pagesë për të gjithë pronarët e Volvo”, ka thënë Mita.

E pranishme në këtë ngjarje ishte edhe ministrja e Industrisë, Ndërmarrësisë dhe Tregtisë, Rozeta Hajdari, e cila ka thënë se prezenca e markës Volvo forcon lidhjet ndërkombëtare të Kosovës.

“Urime të përzemërta për sjelljen e Kosovës në hartën ndërkombëtare të Volvo, kjo është për të admiruar punën e juaj... Na duhet si Kosovë më shumë përkrahje për mbrojtjen e ambientit, por së pari për sigurinë e qytetarit. Hapja e këtij show-room modern si një simbol i inovacionit dhe cilësisë dhe qëllimeve tona të përbashkëta, për rritjen e cilësisë së produkteve dhe shërbimeve për qytetarët tanë, me rritjen e sigurisë dhe praktikave më të mira miqësore me mjedisin duke kontribuar kështu në zhvillimin e qëndrueshëm socio-ekonomik në vendin tonë...(Kjo ngjarje) Është një hap i rëndësishëm për vendin drejt një të ardhme më të pastër dhe më të qëndrueshme për Kosovën, por edhe më shumë siguri për ngasësit, por edhe për qytetarët tanë...Prezenca e markës Volvo forcon lidhjet ndërkombëtare të Kosovës dhe tregon se vendi ynë është një akter gjithnjë më i rëndësishëm në arenën globale të investimeve dhe inovacionit”, tha Hajdari.

Ambasadori suedez në Prishtinë Jonas Westerlund ardhjen e Volvo në Kosovë e ka vlerësuar si një ditë të rëndësishme jo vetëm për Auto Mita dhe Volvo, por edhe Suedinë.

“Kjo është një ditë e rëndësishme, jo vetëm për Auto Mita, jo vetëm për Volvo, por edhe për Suedinë... Suedezët janë mjaft të pasionuar pas Volvo dhe markës Volvo. Nuk është vetëm për arsye nostalgjike, por edhe sepse përfaqëson Suedinë dhe në veçanti përfaqëson sigurinë dhe inovacionin... Sa i përket sigurisë, Volvo ka qenë në ballë të industrisë së makinave qe nga fillimi i tij në 1927. Volvo  shpiku rripin e sigurisë, të cilin e përdorin sot të gjithë prodhuesit e makinave. Ata gjithashtu formuan një ekip kërkimor për trafikun në vitin 1970, duke studiuar aksidentet e trafikut për të parandaluar aksidentet para se të ndodhnin... Pra, në shoqërinë suedeze, marka e makinave Volvo është jashtëzakonisht e rëndësishme për sigurinë dhe inovacionin, dhe, ju e dini, për inovacionin ne gjithmonë konkurrojmë me Zvicrën, se cila do të merr çmimin vjetor ose cili do të jetë vendi më kreativ dhe inovativ në botë”, ka thënë ai.

Përfaqësuesi i Volvo, Boris Mayer, është shprehur i sigurt se së bashku me ekipin e Auto Mita do të përfaqësojnë vlerat e Volvo në Kosovë.

“Ne jemi për fuqinë e bashkëpunimit dhe jam i sigurt se së bashku me ekipin e Auto Mita do të përfaqësojmë synimet dhe vlerat e Volvo në Kosovë. Qe nga viti 1927 për 97 vitet e fundit, pothuajse 100 vjet, ne si Volvo kemi bërë tranzicionin duke vendosur standardet e sigurisë në industrinë e makinave... Nuk është rastësi që në revistën Time, EX90 është vlerësuar si një shpikjet më të mira të vitit, me sistemin e të kuptuarit të shoferit. Pra, makina mund të kuptojë nga njohja e fytyrës nëse shoferi ka ndonjë problem, nëse e ka zënë gjumi, nëse është i sëmurë ose nëse po përjeton ndonjë problem shëndetësor. Në atë rast, makina automatikisht tërhiqet, merr kontrollin nga shoferi dhe më pas lëviz pa shkaktuar ndonjë aksident apo dëmtim të trafikut dhe fillon të japë sinjale dhe paralajmërime...Në vitin 2025, që është vetëm dy muaj nga tani, Volvo do të ketë 15 për qind të shitjeve totale të makinave të makinave të elektrizuara, që do të thotë ose plotësisht elektrike ose hibride, dhe deri në vitin 2030, ne do të vazhdojmë të jemi lider në elektrifikimin, për të pasur një planet më të gjelbër”, u shpreh ai.

•