Pesë persona të dyshuar për përfshirje në sulmin terrorist të 13 nëntorit në Stamboll janë arrestuar në Bullgari, tha të shtunën për BTA, zëdhënësja e Prokurorit të Përgjithshëm, Siika Mileva. Katër prej tyre janë arrestuar me 72 orë paraburgim dhe prokuroria kërkon që ata të arrestohen për një kohë të pacaktuar.

Prokuroria kërkon arrest për një kohë të pacaktuar për sirianin Amran Abdulrami, Peter Topal, i cili ka nënshtetësi bullgare dhe moldave, si dhe shtetasit moldavë Ivan Kalak dhe Leonid Aksakal. E dyshuara e pestë është një grua me probleme shëndetësore, e cila nuk duhet të jetë në burg.

Shërbimi i prokurorisë ngriti akuza për terrorizëm, trafikim njerëzor dhe kontrabandë kundër pesë personave, u tha gazetarëve prokurori Angel Kanev i Prokurorisë së qytetit të Sofjes. Të akuzuarit kanë hyrë ilegalisht në Bullgari. Ata u përfshinë kryesisht në aktivitete logjistike pas sulmit terrorist.

Nga disa vende është kërkuar që të ndihmojnë hetimin, tha Kanev.

Vazhdojnë kërkimet për një person të kërkuar në Turqi.

Personeli kundër-terrorizmit u përfshi në arrestimin e pesë të dyshuarve dhe shërbimi i kundërinteligjences ishte i rëndësishëm në operacion. Bullgaria dhe Turqia kishin punuar së bashku në këtë rast që nga 15 nëntori, tha prokurori.

Gjykata e qytetit të Sofjes më vonë të shtunën, vendosi në paraburgim katër të dyshuarit meshkuj. Sipas gjykatës, nuk ka asnjë provë se ata janë përfshirë në sulmin terrorist, përveç informacionit për një bisedë. Megjithatë, ata do të qëndrojnë në paraburgim për shkak të dyshimeve për trafikim njerëzor.

Seanca gjyqësore u mbajt me dyer të mbyllura për shkak të përfshirjes së informacionit të klasifikuar nga disa shërbime sigurie, bullgare dhe të huaja.

Ky vendim i gjykatës nuk është përfundimtar.