Një moment historik po bëhet gati në futbollin e Arabisë Saudite, pasi Al-Nassr po konsideron përfshirjen e Cristiano Ronaldo Jr në stërvitjet e ekipit të parë për sezonin 2026/27.

Sipas raportimeve të Daily Mail Sport, 16-vjeçari, i cili ka ndjekur hapat e babait të tij në akademinë e klubit saudit, mund të ketë shansin të luajë krah legjendës 41-vjeçare në një ndeshje zyrtare profesioniste. Ky veprim do të realizonte ëndrrën e kamponit portugez për të ndarë fushën me djalin e tij të madh, duke iu bashkuar kështu një liste shumë të ngushtë baballarësh që kanë arritur këtë sukses në historinë e futbollit.

Vetë Ronaldo, i cili vazhdon të mbajë një formë mbresëlënëse pavarësisht moshës, ka thënë më herët se kjo dëshirë nuk është një obsesion, por do të ishte diçka e jashtëzakonshme.

"Do të më pëlqente shumë. Do të shohim, është më shumë në dorën e tij sesa në timen. Vitet po kalojnë dhe do të vijë një kohë kur nuk do të jetë më e mundur," citohet të ketë thënë ylli portugez për gazetën britanike.

Ronaldo Jr, i cili luan si sulmues dhe përfaqëson Portugalinë në nivelin moshës së tij, po shihet si një talent me perspektivë të madhe, teksa rrugëtimi i tij drejt ekipit të parë po përshpejtohet për t'u bërë pjesë e elitës krah babait të tij.

KosovaPress