Ish-komandanti i UÇK-së në zonën e Llapit, Rrustem Mustafa ka thënë se operacionet e Policisë së Kosovës kundër institucioneve të paligjshme të krijuara nga Serbia në veri të Mitrovicës, Zveçan, Zubin Potok dhe Leposaviq janë bërë me qëllim të vendosjes së rendit dhe ligjit.

"Normalizimi në veri të Kosovës. Kosova ka detyrë që të vë kontrollin ligjor në gjithë vendin, besoj se të gjithë po mësohen me këtë normalitet dhe duhet uruar veprimet e mira që po na vinë me vendosjen e rendit dhe ligjit", ka shkruar ai në Facebook.

Tutje, ai ka thënë se me maturi dhe vendosmëri po mbyllë ciklin e involvimit të Serbisë në territorin e Kosovës.

"Policia e Kosovës ka zhvilluar operacione kundër institucioneve të paligjshme të krijuara nga Serbia në veri të Mitrovicës, Zveçan, Zubin Potok dhe Leposaviq. Çështjet që kanë të bëjnë me strukturat ilegale të ndërtuar nga Serbia për të bërë Kosovën jo funksionale, Kosova duke pasur parasysh ndjeshmërinë që është krijuar deri sot, me maturi dhe vendosmëri po mbyllë ciklin e involvimit të Serbisë në territorin e Kosovës", ka përfunduar ai.