Trajneri i Manchester Cityt, Pep Guardiola, ka sugjeruar që Joao Cancelo mund të kthehet në “Etihad Stadium” këtë verë.

Kanë kaluar gjithsej 18 muaj që kur mbrojtësi 30-vjeçar u paraqit për herë të fundit për Cityn, kur luajti plot 90 minuta në humbjen 2:1 ndaj rivalit të qytetit, Manchester United në Premier Ligë, raporton KosovaPress.

Pas një qëndrimi të shkurtër në Gjermani me Bayern Munichun gjatë pjesës së dytë të sezonit 2022/23, Cancelo kompletoi një transferim në formë huazimi te gjiganti i La Ligas, Barcelona verën e kaluar.

Reprezentuesi portugez ka bërë që atëherë një përshtypje të dukshme në “Camp Nou”, duke regjistruar katër gola dhe pesë asistime në 42 paraqitje në të gjitha garat, dhe konsiderohej si një lojtar kyç nën drejtimin e ish-trajnerit Xavi.

Marrëveshja aktuale e huazimit të Cancelos me Barçën do të skadojë këtë muaj, por presidenti i klubit Joan Laporta ka konfirmuar se ata janë në negociata për të mbajtur mbrojtësin e krahut për sezonin e ardhshëm, me Hansi Flick tani në krye të klubit katalanas.

Mes gjendjes financiare të mirë-dokumentuar të Barcelonës, mbetet për t'u parë nëse gjigantët katalanas mund të arrijnë një marrëveshje me Manchester Cityn për Cancelon që i përshtatet të gjitha palëve.

Cancelo ka ende tre vjet të mbetura në kontratën e tij në “Etihad” dhe nëse një marrëveshje nuk mund të arrihet midis Cityt dhe Barças, Guardiola ka sugjeruar që mbrojtësi i krahut do të riintegrohet në skuadrën e tij për përgatitjet parasezonale.

I pyetur për situatën e Cancelos, pas pjesëmarrjes në turneun e golfit Legends Trophy në Girona, Guardiola tha:

"Duhet të jetë më e mira për të gjithë. Dy klubet do të ulen. Ai është lojtari ynë dhe, nëse nuk arrihet një marrëveshje, ai do të duhet të kthehet në para-sezon. Nëse ai dëshiron të qëndrojë këtu në Barcelonë, dhe klubet bien dakord, do të bëhet përsëri".