Nënkryetar i Kolegjit të Kirurgëve të Kosovës për SHBA, Mentor Ahmeti deklaroi se Kongresi Klinik i Kolegjit të Kirurgëve të Kosovës ngritë nivelin shkencor kirurgjik në vend.

Kirurgu shqiptar që profesionin e ushtron në Amerikë në një intervistë për KosovaPress foli për kursin Advanced Trauma Life Support të Traumës ATLS i cili ka filluar të mbahet nga viti i kaluar në Kosovë.

“Mendoj se është një takim shumë i rëndësishëm i cili ngrit jo vetëm nivelin e shkencave kirurgjike në Kosovë, mirëpo ka një impakt shumë të madh në gjithë shëndetësinë e Kosovës”, tha ai.

Mentor Ahmeti i cili drejton edhe Kursin Advanced Trauma Life Support të Traumës (ATLS), u shpreh se ky kurs i cili tashmë ka nisur edhe në Kosovë e ngritë cilësinë e trajtimit të pacientëve të traumës.

“Kursin më të njohur për licencimin dhe certifikimin që merren me trajtimin e pacientëve të lënduar apo traumave fizike. Kursi është një kurs shumë intensiv, dy ditë e gjysmë dhe është kurs i cili jepet nëpërmjet Kolegjit të Kirurgëve të Amerikës, është një nga kurset e para që Kolegji i Kirurgëve të Amerikës e ka themeluar në mënyrë që të ngrit cilësinë e trajtimit të pacientëve në këtë rast të pacientëve të traumës”, deklaroi Ahmeti.

Ahmeti i cili është edhe kirurg i Traumës, kujdesit Akut dhe Kritik në Qendrën Mjekësore Sanford në Fargo, Dakotën e Veriut tha se Kosova ka bërë hapa të mëdhenj në mënyrë që kursi ATLS të formalizohet brenda tri viteve në Kosovë.

“Gjatë kësaj kohe janë bërë hapa shumë të mëdhenj në mënyrë që kursi të formalizohet në Kosovë brenda tri viteve. Një nga ata hapa është se kemi trajnuar 5 instruktorë nëpërmjet Kolegjit të Kirurgëve të Amerikës që janë në Kosovë punëtorë shëndetësor, 3 kirurgë, një doktoreshë anesteziologe dhe një doktoreshë nga emergjenca. Ata tani janë të njohur nga Kolegji i Kirurgëve të Amerikës si instruktorë”, tha ai.

Ahmeti për KosovaPress u shpreh se shëndetësia kosovare ka avancuar.

Sipas tij Kosova ka mjaftë mjekë, por nevojiten politika adekuate për shpërndarjen e mjekëve aty ku ka nevojë.

“Kemi arritur shumë, kemi mjekë në të gjithë Kosovën ma merr mendja që ka mjekë të mjaftueshëm, mirëpo distribuimi i tyre mund të mos jetë ashtu siç duhet natyrisht për ato duhet të bëhen si politika shoqërore dhe politika kapitaliste në mënyrë që të mbahen ata në vend dhe të dërgohen aty ku ka më së shumti nevojë”, deklaroi kirurgu shqiptar i traumës.

Kirurgu shqiptar i traumës që karrierën e tij e zhvillon në Amerikë, Mentor Ahmeti nuk e sheh shumë problematike largimin e mjekëve nga Kosova.

Ai konsideron që Kosova duhet të krijoj infrastrukturë që njohuritë që këta mjekë i marrin në vende të ndryshme të botës të kenë mundësi t’i sjellin në vend.

“Për vete nuk e shoh si problem të madh  dje u pa sa kirurgë kemi jashtë që po bëjnë punë të mrekullueshme dhe pastaj po e sjellin këtu, programi ATLS është një fakt i tillë unë kam dal jashtë kam ikur  nga Kosova mirëpo po kthehem në Kosovë me dicka shumë të madhe, po të isha në Kosovë do të isha mendoj se ka një potencial shumë të madh tek ata njerëz që po dalin jashtë  në mënyrë që të zhvillohet infrastruktura këtu në mënyrë që ata t’i sjellin njohurit dhe ta përmirësojnë shërbimin këtu”, theksoi Ahmeti.

Në ditën e dytë të Kongresit të katërt Klinik të Kolegjit të Kirurgëve të Kosovës i cili po mbahet në Prishtinë po marrin pjesë rreth 500 profesionistë shëndetësorë.

Krahas pjesëmarrësve nga vende të ndryshme të botës kanë ardhur për të ligjëruar 50 kirurgë të njohur, ndërsa edhe 64 ligjërues janë nga Kosova e vendet e rajonit.