Dy nga policët e lënduar mbrëmë nga aksidenti me automjetin zyrtar të blinduar në Zveçan po trajtohen në Kirurgjinë Torakale dhe atë të Klinikës së Ortopedisë me Traumatologji, pranë Qendrës Klinike Universitare të Kosovës (QKUK).

Sipas mjekëve kujdestar, pacientët kanë lëndime trupore, porse gjendja e tyre është stabile.

Sipas njoftimit të Policisë së Kosovës, në këtë aksident janë përfshirë vetë drejtuesi i automjetit zyrtar dhe shtatë pjesëtarë të PK-së, të cilët kanë qenë në kryerje të detyrës.

Dyshohet se drejtuesi i automjetit zyrtar të blinduar ka humbur kontrollin mbi automjet dhe ka dalë jashtë rruge.

Mjeku kujdestar në Kirurgjinë Torakale, Frederik Çuperja tha se pacienti ka thyerje të shumëfishtë të brinjëve dhe ndrydhje të kraharorit, porse gjendja e tij aktualisht është stabile.

Ai potencoi se polici rreth të tridhjetave do të vazhdojë të marrë trajtim në Kirurgjinë Torakale edhe më tutje.

Ndërkaq, shefi i ekipit kujdestar në Klinikën e Ortopedisë me Traumatologji, Ermir Shabani tha se njëri nga policë e pranuar mbrëmë i është nënshtruar një operacioni me ç’rast i është vendosur një pllakë në pjesën e kërcirit (afër gjurit).

Ai tregoi se gjendja e pacientit është jashtë rrezikut për jetë dhe se pritet të lirohet nga spitali pas rreth një jave.

Vetaksidenti në fjalë ka ndodhur rreth orës 20:00, sipas Veton Elshanit, zëvendësdrejtor në Policinë e Kosovës në Mitrovicë të Veriut.