Kryetari i Lidhjes Demokratike të Kosovës, Lumir Abdixhiku, ka thënë se do të prezantojë planin e kësaj partie për kapërcimin e krizës në vend. Ai ka bërë të ditur se në ditët në vijim do të bisedojë me shoqëri civile, akademikë, politikanë e miq të Kosovës nëpër botë për të kërkuar mbështetjen e tyre për ndërtimin, siç ka thënë ai, të masës kritike e zërit alternativ.

Sipas Abdixhikut, kryeministri Albin Kurti nuk e bën Kosovën shtet evropian.

“Albin Kurti nuk e bën dot Kosovën shtet evropian. Ai, grupi i tij ideologjik nga Tirana, analistët e paguar e mediat e pushtetit janë në misionin e tyre ultim të përplasjes përfundimtare të shtetit. Në sinkron, i pari na dërgon drejt përplasjes, të dytit e bëjnë këtë çmenduri të duket bukur. E vërteta është e trishtë. Kosova nuk ka qenë kurrë më keq ndërkombëtarisht se sa sot. Serbia nuk kanë pasur kurrë më shumë përkrahje ndërkombëtare se sa sot. Ata po fitojnë. Ne po humbasim. Kauza e tyre e autonomisë territoriale në Kosovë po merr formë teksa ne mjaftohemi me të drejtën tonë në përballje me gjithë botën”, ka thënë ai.

Ai ka shkruar se Kosova ka një rrugë të re e cila e dërgon shoqërinë drejt familjes euroatlantike, e sipas tij, kjo rrugë nuk e ka Kurtin në të.

“Prandaj, gjatë ditëve në vijim, do të ftoj akterë të shoqërisë civile, akademisë, sektorit privat, mërgatës, mediave e opinionistëve, partive politike, shqiptarëve në rajon e miqve të Kosovës nëpër botë për të ndërtuar rrugën e vërtetë. Do t’u prezantojë dhe planin e LDK-së për kapërcimin e izolimit e krizës. Në këto takime do të kërkoj mbështetje për ndërtimin e masës kritike e zërit alternativ që bota perëndimore duhet ta dëgjojë nga ne tani. Vendi ynë ka një të ardhme ndryshe nga çfarë na projektohet sot. Kosova mundet më mirë. Kosova meriton më shumë”, ka shkruar kreu i LDK-së.